jimmycmlin的部落格

台語文~~~~~2006美西探親旅遊記(4)~~~~~遊子
準時morning call和出發，外頭暗摸摸，只有路燈企歸列來照光，天頂的繁星一熠一熠來cua路，
逐家踮車內補眠啦！路程實在闊長，一坐又是2點半鐘，半路中看到日頭漸漸跳出大地，車行真遠才
會當看到幾間仔民家茨，農場、牧場攏是一大片，有的農舍就親像在西部片電影所看到的樣；由平
洋進入去山區，就是今仔日遊覽的重點：優勝美地國家公園(Yosemite National Park)‧講是加
州上嫷的公園地區，嘛是第一個受到美國聯邦政府保護的自然區，又是遊客上濟的國家公園‧


有名的自然旅遊作家約翰‧穆爾(John Muir)的描述是：完全無法度有人工的殿堂會當和優勝美地
國家公園比較，Big Stones, Big Trees, Waterfalls and Breathtaking Views!懸大企立
的大石山壁、山景，奇特造型造景，予人感歎造物者的神奇偉大；大叢古木親像欲插入天，山頂白雪
蓋頭，歸年﹝勿會﹞融，沿著山溝造成萬年不溶的冰河，沿途不時看到由山頂掛落來，一片一片、一
條一條親像白色玉緞的瀑布，瀑布會綴著四季溫泉、水量的改變來變化‧
咱就來對照看伊所描述的是毋是有影？


沿途的溪水，有時恬恬流入大粒石頭仔縫，流過石頭仔頂，展開做大片短短的瀑布，看起來稍可仔像
日本東北地區真有詩意畫境的奧入瀨溪，有時是像千軍萬馬佇走zong，聲勢雄偉，溪流中的大粒石頭
仔，企在在﹝勿會﹞振動，和咱花蓮中部橫貫公路的太魯閣段有親像；下車行入林仔內欣賞好景緻時
，空氣清鮮，不過，氣溫真低，差不多是10度左右爾爾，好佳在有攢外套通保暖；懸大企立的大石山
壁，予企在下仔的遊客變成一屑屑仔爾，大細條算﹝勿會﹞完的瀑布，實在攏真嫷，意境感受嘛攏無
共款；沿著細條路仔，行到一位上壯觀的大瀑布下，衝擊的流水變成千千萬萬真幼的水滴，飄浮分散
在附近的空氣中，企在迄所在親像在霧氣中，嘛親像在落毛毛仔雨，日頭一照，由無共角度會當欣賞
到1條至3條的彩虹，實在有夠嫷啦！在恬靜的樹林內，聽著大瀑布衝擊大石山壁的水聲，浸入清涼的
水氣中，吸著清鮮的空氣，看著滿山的青翠和掛在藍色空中的彩虹，造成一幅真難得的畫面‧又看到
上懸的山頭，一片一片的白雪，日頭照著反射，搁卡刺目，he是歸年透天攏﹝勿會﹞融的‧山頂融的
的雪水，就是山跤流水的源頭，豐富沿途大地的活泉‧透早出發來到遮，有價值啦！


停留在優勝美地國家公園短短的1點鐘後，繼續續落的行程；在半路中一個農場稍歇睏，補充一寡仔新
鮮的果子，加州的氣候乾燥，每工攏需要補充足額的水份和新鮮的果子，對皮膚、肺管、身體健康有
幫助‧頭一暗Eric san為阮攢的物件嘛食到差不多啦！所以，趁即時陣緊來補充，茄仔色和青色的葡
萄，攏是大粒、無子又甜，紅色和青色的蘋果，香吉士橘子，奶油果、芎蕉等等，價數看起來是無俗，
不過，這幾工攏是行真遠才歇睏，又無一定有新鮮的果子通買，亦是愛加減攢幾樣仔才妥當‧


總仔又經過3點半鐘的車程後，來到華人佔有25%的舊金山(San Francisco)囉！華語嘛有翻譯做三蕃
市，每4個市民中就有1個華人，比率實在驚人啊！新加坡的華人佔有80%，舊金山大概排第二位啦！早
期移民的華人是勞動者佔大部份，後來才漸漸改善，離舊金山無若遠的聖荷西(San Jose)”矽谷”
(Silicon Valley)，是高科技發展區，嘛真濟華人在hia上班食頭路‧