台語文~~美加東旅遊記(4)/美國開基地Boston波士頓－jimmycmlin的部落格

(國界的美國關口)
台語文~~~~~美加東旅遊記(4)/美國開基地Boston波士頓~~~~~遊子
台灣拄是梅雨季的尾聲期，過了五日節就是完全每工30外度熱天的氣候，無想到即陣由加
拿大北爿的Quebec(魁北克市)欲往南去美國開基地Boston(波士頓)，透早8點時才4度爾
爾耶！毋過，愈往南溫度愈懸，過美加國境後，佇1個3000人的小鎮Derby Town歇睏食晝
，聽服務生講前幾工這附近猶有落淡薄仔雪喔！日頭出來攏融去啦！經過800公里的車程，
總算來到300外年前，美國上早的開基地~~Boston波士頓！下晝時溫度是23度，半工內溫
差19度喔！因為佇Boston有真濟制度、建設是全美國上早有的，是tshua7頭的作用，所
以講，Boston波士頓是美國文化的搖籃仔！

(水陸兩用遊覽車)
行佇街仔路，大粒石頭起的茨，尖茨頂的教堂、青翠闊闊的公園，氣派的市政廳，方便的
地下鐵路捷運系統、歷史悠久世界有名的哈佛大學(Harard)，清幽整齊的公墓，清氣的
波士頓河，河面有帆船遊艇活動，出名的波士頓交響樂等等，這攏是佇全美國上早有的物
件‧規個市內的建設規劃，充滿著滿滿是的藝術佮學術的人文氣氛，好像佇歐洲共款，佮
後來美國其他都市發展的風格無相像，每所在攏親像一幅一幅定格的風景圖，予人感覺無
壓力真輕爽‧

(哈佛大學校園之一)
Harvard University哈佛大學的歷史比美國建國的歷史閣較久長，校園真正嫷，行入校
園就自然感受到自由自在的氣氛，是培養高科技技術、企業經營管理佮人文藝術的好所在
，歷史上嘛出過幾仔位美國總統；雖然，學費無俗，1年愛開6~7萬美金，世界逐國來的留
學生猶原非常濟，咱台灣的留學生嘛真濟，每年佇媒體攏看到辦”留學哈佛台灣同窗會”
的消息‧

(麻省理工學院校門)
另外1間麻省理工學院(MIT)，亦是非常出名的大學，因為以理工專業佮實際科技為主，比
較予人感覺較無人文氣息，毋過，理工科技的新技術非常厲害，佇2擺世界大戰時，攏開發
出真濟新技術用佇戰場，予美國的盟友國才會使拍贏得到上尾仔的勝利‧對美國對全世界
攏是真正有貢獻‧

(兩支大螯的龍蝦)
暗頓是這次旅遊2擺風味餐其中上特別的一擺，因為波士頓倚大西洋，出產兩支大螯的龍蝦
，佮咱台灣所食的龍蝦無共品種，每人1隻，差不多有倚1斤重，每1隻攏掛牌表示是野生的
，心內雖然有稍可仔疑問，食的人愈來愈濟，野生的速度甘會赴大隻？數量甘有夠用？毋過
，mai3想赫濟，家私頭仔提過來，先享受才講，哇~！有影讚啦！肉質飽實，甜蜜閣鮮，食
完龍蝦看到其他的菜色攏無胃口囉！導遊亦算有良心，團員中有1位全程食素食，因為無法
度享受到龍蝦，退伊10箍美金‧