台語文~~~~~笑科集﹝輯﹞-8~~~~~遊子整理 2008.01.30.
(60).長途國際電話中的對話‧
“喂！喂！張的是喔！我是李的啦！”
“喔！是李的啊！真罕著聽到你的聲，有什麼代誌？”
“即陣，我佇東京辦的代誌有出淡薄仔問題，需要週轉10萬箍，毋知你有方便無？”
“喂！喂！喂！你講什麼聽攏無？奇怪？聽攏無耶！”
“我是講欲甲你先借10萬箍啦！”
“喂！你講什麼亦是聽袂清楚啊！這個電話恐驚有問題的款！”
中間傳來接線生插喙講：”喂！我是接線生，，阮的線路無問題，我聽恁朋有講甲真
清楚！”
張的無歡喜應講：”按呢，你借伊10萬箍好啦！”
(61).阿旺講：”歇睏日，佇菜園仔掘菜股，踮菜股邊仔kioh著1個10箍的銀角仔，
就囥入去衫袋子底；續落去做穡，過無若久又kioh著1個10箍的銀角仔，共款囥入去
衫袋子底；毋過過無若久又kioh著1個，就按呢，頭尾總仔kioh著10擺‧”
阿芳聽了講：”遮尼阿好孔！是毋是佇菜園仔挖到寶？”
阿旺講：”毋是啦！原來是我的衫仔袋破孔，破毋知啦！”
(62).阿公認真學拍電腦，孫子教伊按怎寄電子批‧
孫子特別交代講：”這是真正方便、閣緊、閣省錢，攏免貼郵票喔！”
過了幾仔工，阿公問孫子講：”奇怪，我明明已經寄規禮拜囉！kha3電話問阮朋友，
伊講攏嘛無收到我寄予伊的電子批‧是按怎會按呢？”
孫子問講：”你甘有有照我彼工教的方法做？”
“有啊！你講免貼郵票，我佇批lok仔頂寫完整的電子批地址，封好無貼郵票就tan3
入去郵筒啦！”
(63).愛嫷的查某人對少年的講：”你應該先問過我才通去向阮查某囝求婚！”
“是按呢喔？”少年的講：”失禮啦！我毋知影你對我亦遮尼阿有意思啊！”
(64).人講嚴官府出厚賊‧王經理是驚某出名的，有1工，伊的牽手無通知就去辦公室
揣伊，拄仔看到少年秘書坐倚王經理的大腿頂‧
王經理心內雖然非常驚惶，毋過，心頭照常掠予定，用交待代誌的口氣對少年秘書講
：”---上尾仔，各位董事，毋管公司的財務按怎仔艱苦，我的辦公室嘛袂當干哪像
按呢囥1隻椅子爾爾‧”
留言列表
