jimmycmlin的部落格

台語文~~~~~單親阿母~~~~~(遊子譯自”細細的Blog.”) 2008.08.01
有1個年歲將近40的朋友，猶原無想欲結婚，毋過，伊想欲綴時行，拍算先來生1個囡仔，
嘛斟酌佇揣看有較適當的查埔的來作種‧伊嘛毋算是頭1個食毛蟹的人啦！所以，亦無人
出面來阻擋伊想欲做的代誌‧
另外1個朋友佇2年外前佮人假結婚來生1個囡仔，後來拄到任何麻煩的代誌，比喻講：戶
口方面、茨邊頭尾的閒話仔等等，攏會使開錢消災來化無去，毋過，最近伊的細漢囡仔，
看到任何1個親像阿叔的查埔人攏叫阿爸，予伊的心情真bai2，強強欲止節袂tiau5，心
內非常艱苦，有時陣嘛懷疑講起先家己的決定甘是毋對的啊？
佇過去傳統社會的看法，單親阿母是1個帶有悲劇色彩的名詞，毋過，隨著時代大環境的
變遷，查某人的經濟能力提升佮感情態度的獨立，查埔人佮查某人的互相關係亦漸漸改變
囉！逐家嘛無法度閣用過去的目色來看待‧佇即陣的社會，有真濟經濟能力好的單親阿母
帶著囡仔，過著真好的生活品質來過日子，佇教育問題方面，表面上佮一般完整家庭的囡
仔無什麼無相共，毋過，佇其他的問題就無一定啦！
咱佇外國電影內嘛定定看到單親阿母的劇情，過去看到會想講彼是編故事做戲的啦！其實
俗語有講：戲台頂搬的，戲台跤就有‧有影啦！咱來看一寡仔數字：美國佇1960年的單親
阿母佔全部成年查某人的7%，到2000年增加到將近25%；佇1960年的單親阿母有72%是因
為死翁、予翁婿放sat等原因造成的，到2000年時，相共的因素降落到只佔24%爾爾；離
婚的因素由24%增加到35%，而且這個趨勢是愈來愈增加‧亦有無想欲結婚干哪欲生囡仔的
佔41%喔！到即陣佇美國每3個細漢囡仔內，就有1個是由單親阿母來搖飼的‧
並毋是每1個單親阿母攏會拄到經濟問題，毋過，每1個單親阿母佮伊的囡仔濟濟少少攏一
定會拄到社會壓力的問題，特別是囡仔無希望講伊家己的家庭佮別的囡仔的家庭無共款，
尤其佇細漢時身份的認知會造成心內的不安佮生活上的困擾、麻煩，變成1種陰影藏佇心內
，甚至綴到大漢的時‧
對單親阿母這個問題，我感覺綴著社會環境時勢的變遷，數量愈來愈濟，社會的接受度嘛
愈來愈懸，漸漸變成社會生活中真四常的代誌，毋哪佇美國達到4分之1，佇全世界嘛差不
多阿差無若濟，所以行到世界任何所在，看到無結婚來生囝的人，已經毋是什麼袂見著人
的大代誌啦！
毋過，天道陰陽自然協調，1個人去擔原本2個人的代誌，按怎樣講亦是較食力的啦！個人
來講毋哪需要有好的經濟能力，嘛需要心內有真正堅強的意志佮決心，才有法度予母仔囝
快快樂樂、平平安安、久久長長同齊行落去。