jimmycmlin的部落格

台語文~~~~~2011年22個關鍵字詞~~~~~遊子 2011.01.03.
進入新的1年，網路科技進步非常緊，隨時出現新字詞，對咱日常生活亦漸漸有真大的影響，咱未當毋知影，未當無瞭解‧由報紙雜誌等媒體的資訊，整理出大約有22個關鍵字詞，紹介予大家來參考‧
科技風雲有關：
[01].平板電腦：自2009年的iPad上市開始，到2010年愈來愈時行，愈來愈搶市，已經有取代2年前小筆電ePC的地位‧
[02].3D：予消費者享受到立體感的刺激，由電影發展到電子產品，包括電視、相機、筆電、螢幕、藍光播放器等等，技術愈來愈進步，只是內容需要加強‧
[03].無人駕駛：就是自動駕駛的概念，親像目前飛機長途的自動巡航，無人駕駛的飛機、汽車，大小的機器人等等，除了工廠生產線，日常生活以外，佇防災救災的運用，會愈來愈需要‧
[04].雲端運算：簡單講就是將逐種資料囥佇網路上某1個所在，需要的人隨時會使進入提出來用；親像現此時的電腦、手機、電子冊等等，攏已經實在佇使用囉！未來雲端愈普遍時會改變軟體應用的收費模式‧
[05].體感遊戲：自2010年底上市的Kinect for Xbox 360，予電玩正式踏入無需要用手提任何控制器，就會使自由操作控制的境界；短時間內傳統遊戲佮體感遊戲猶原會同齊存在，無法度完全取代鍵盤、滑鼠的精密操控，等等技術閣較熟手時，未來體感遊戲的應用會愈來愈普遍‧
生命趨勢有關：
[06].世界末日：自電影”明仔載過後”，予全世界的人感受到世界末日真正會出現，尤其最近全球氣候變化非常激烈，山崩、地裂、做大水、大地動、火山爆發、落暴雪、渴旱、砂塵暴、火燒山等等，亦引起全世界開始注重地球的溫室效應，研究替代能源，做好環境保護，毋通繼續過度開發，將國家經濟發展的腳步放慢，人民改變想法佮生活習慣，同齊拍拼來對抗世界末日的發生‧
[07].微落：是指中國的微網誌[Microlog]，華語叫”微博”，比傳統的”部落”[Blog]閣較簡短，一般是200字以下，亦會當上傳相片、電影、音樂等等‧因為中國管制”面冊”[Face Book]進入中國，所以，才另外發展出”微落”，抑無，”面冊”[Face Book]的功能閣較多元、精彩、趣味、好用，使用人數超過6億5千萬，以人數來講，已經是全世界第3大的國家喔！
[08].肌因：由基因科技的進步，配合人類愛嫷、抗老化的需要，發展出肌因保養美妝品，未來市場的銷售一定是愈來愈旺啦！
[09].超級病菌：上起頭出現佇歐洲佮亞洲，號名為”NDM-1”因為毒性大，現有的抗生素大部份對伊無法度，醫學上叫做多重抗藥性的超級病菌；其實自歷史上來看，病菌佮抗生素一直是互相競爭，出現新病菌後，科學家就研究出新的治療抗生素，過了一段時間後，病菌會自然閣變種，來對抗現有的抗生素，就是按呢輪流出現，咱只要mai3亂用消炎的抗生素，自然會當減少病菌的變種‧
[10].米其林餐廳：是1900年由米其林輪胎公司發行” 米其林餐飲指南”的冊，以3粒星為評鑑的分級，由1粒星~3粒星，選出值得推荐的優等餐廳，米其林的星級餐廳攏是會使予消費者信任的；由巴黎版開始，擴展到2008年東京版、2010年香港版等等，希望有1工米其林的星級餐廳咱的台灣版亦有機會推出‧
[11].人肉搜索：因為網路科技的發達佮普遍化，予熱心的網友會當進行鋪天蓋地的找揣，揣出好歹事件相關的主角，予歹徒無位通[必見]，表現出小兵立大功，狗蟻陣扛大象的力量‧如果配合監視器，警方揣人會閣較緊；毋過，凡事有好亦有[禾黑]，因為使用無拄仔好，亦會侵犯到個人的隱私喔！
經濟面有關：
[12].MIT泰國：遮的MIT毋是咱所講的台灣製造[Made in Taiwan]喔！是Made in Tailandm的簡單寫；是1997年泰國受到經濟風暴後，泰國政府為著提升國際競爭力，全力將資源投入研究創意產業，提供逐項培養設計人才的貸款，亦連續舉辦時行設計相關的展覽會‧由食的、穿的、蹛的佮行的攏有，創立泰國的自有品牌，行銷去全世界‧
[13].做白工族：華語叫窮忙族，英語是Working Poor；是指每禮拜做穡40點鐘，亦是40點鐘以上的全職工作者，月給所得無夠上低的薪資標準，生活佇散赤線[華語叫貧窮線] ，英語是Poverty Line的員工，月給所得無法度滿足日常生活的上低標準，以咱台灣來講，2011年政府公告的每月上低薪資標準是新台幣17800箍‧大家做白工，趁無食，出口增加的錢毋是入大頭家的袋子，就是予中國工人趁去，繼續落去是會削弱咱台灣社會的競爭力啊！
[14].糧荒：世界人口的增加，閣有前仔講到地球溫室效應，天氣變化無正常，予逐種農產品欠收，原油、礦物等起價，漸漸出現糧食危機‧所以，咱台灣政府最近一直推行廢農地改為工業區，實在是大錯特錯，違背著時代的趨勢‧
[15].熱錢：英語是Hot Money，亦叫做遊資Refugee Money；是指短時間內，真緊佇某1個國家、地區出入，追求短時間內就緊搶趁大錢的國際性流動資金‧受到熱錢出入的國家、地區，會造成股市、房地產市等大起大落，亦會引起通貨膨脹，影響到社會民生佮民心‧
[16].內容消費：1990年代發展出來的體驗消費，予消費者毋只買到產品本身爾爾，亦會使得到5官的滿足‧2010年後，體驗消費閣進一步，提升入消費者身心靈的昇華‧親像綠色消費，毋哪買到物件，亦盡到環境保護的力量，雖然是淡薄仔爾爾，眾人同齊來做，亦有大效果喔！
[17].俗價航空：因為市場競爭，有航空公司將票價降低，真正俗，毋過，機內逐項服務攏取消，需要時才另外付錢，飯包、飲料、白滾水當然愛另外付錢，欲枕頭、毛毯亦是另外付錢，聽講欲去便所亦是愛另外付錢喔！有旅客只要方便就好，甘願犧牲享受來搭機，所以，亦愈來愈時行，飛的路線亦愈來愈濟耶！
社會現象有關：
[18].偽娘：是由日本的動畫、翁仔冊佮電玩所描述的人物，指少年查某囡仔款的查埔人，雖然身體是查埔的，外表佮行為，講話動作佮氣質，有時比查某人閣較查某人款，伊無需要穿查某人衫，所以，佮一般男扮女妝無共，當事者嘛真清楚家己是查埔的，並無性別認同的困擾，華語亦有叫做”少女系男孩”‧
[19].台灣之光：是咱台灣囡仔佇世界逐所在、國家參加比賽，拼命得到好成績，好名聲，攏會大聲喝出：我是台灣來的！我是代表台灣！予全世界看到咱台灣！予全台灣人感覺驕傲有信心，雖然處處予中國打壓，咱台灣囡仔猶原無驚、好表現‧予咱台灣佇世界舞台的腳步企閣較穩、閣較在‧
[20].閃婚：就是閃電結婚，指查埔、查某双方捌無若久就結婚變成翁仔某‧因為互相瞭解無濟，亦造成離婚率愈來愈懸的原因‧
[21].阿爾法查某囡仔：英語是Alpha Girl，是由美國哈佛大學教授Dan Kindlon提出，以希臘字母的頭1字”Alpha”為靈感，表示比同年的查埔囡仔表現閣讚的查某囡仔‧阿爾法查某囡仔亦表示成就動機較強，無欲予傳統束縛，有能力佮機會去完成夢想‧相對的概念，以希臘字母的上尾仔1字”Omega”，叫”Omega Boy”表示能力真差的查埔囡仔‧
[22].高齡化社會：自1945年二次大戰後，開始出現戰後嬰兒潮，指1945~1965年出世的人，是目前人數上濟的1世代，全球總數差不多有超過2億人，佇美國近800萬人，掌管全美國55%的收入，60年後的今仔日，戰後嬰兒潮開發轉為退休潮，對社會造成真大的衝擊佮商機‧咱台灣共款亦綴著世界潮流，亦已經進入高齡社會囉！以往政府只注重軍公教佮榮民的養老福利，這是非常無公平的政策，全民攏有納稅，嘛應該公平來注重全民的養老問題才是啊！