用藥保健~~~~~高尿酸血症佮痛風~~~~~~~~遊子
(1).什是高尿酸血症？
痛風佇以前是算富貴病的一種，大部分是中年以後才發生；不過，現代人營養好，
食好做輕可，又搁欠運動，所以，即馬發病的人愈來愈少年，甚至有二十外歲就有
痛風發作喔！咱攏知影尿酸是引起高尿酸血症佮痛風的病母原因，由咱日常生活所
食的物件，入到身體內變成普林，再一擺經過代謝，就變成尿酸；所以，每一個人
體內攏有尿酸，佇查某人體內濃度超過每100cc的血中有6毫克以上；佇查埔人體
內超過7毫克以上，就判定是高尿酸血症‧
(2).什是痛風？
抑準高尿酸血症的人，佇跤趾頭公的關節，無一定是正跤抑是倒跤，有像針佇刺，
稍可紅紅，就是病情發做，叫做痛風‧準做暗頭仔發做，無隨去互先生看，緊食藥
注射，隔工就會腫甲像麵龜，疼甲﹝勿會﹞踏塗跤，一見到風就艱苦，所以，才會
叫做痛風‧
(3).高尿酸血症佮痛風對身體健康有什影響？
除了頭前講的腫痛以外，另外是尚懸的尿酸，會積佇腰子內，塞佇細條管，引起結
石，嚴重時腰子無法度作用，愛磅石仔抑是開刀提出石仔，搁卡嚴重時愛換腰子喔
！抑有，尿酸尾仔會走去大大細細的關節，除了腫痛以外，又會變形彎彎曲曲，甚
至耳仔嘛會凸一粒一粒‧有的時陣愛換人工關節才有法度行路喔‧
(4).安怎治療佮預防高尿酸血症佮痛風？
若是已經發作，當然是緊去病院互先生看，注射抑是照時間食藥仔‧佇平常時安怎
來預防病情發作？這由兩方面來講：增加尿酸的排泄和減少尿酸濃度的增加‧咱知
影每工需要﹝口林﹞2000cc以上溫的滾水，佇熱天因為流汗的關係，上好﹝口林﹞
2500-3000cc卡適當，放尿愈大把愈大港愈好，會當順序排除體內的尿酸‧麥仔
酒毋通﹝口林﹞，厚酒會當﹝口林﹞淡薄仔爾爾，不相信的人試看嘪，隔工一定隨
痛風發做‧
搁來就是安怎減少尿酸濃度的增加？這就愛由飲食習慣來改善，含有卡濟普林的食物
卡﹝勿會﹞當食尚濟，並毋是攏﹝勿會﹞食哩，食卡少就好‧食素的人嘛會得到痛風
佮高尿酸血症喔！
另外是愛保持拄好的體重‧理想的體重公式：22X身懸(公尺)X身懸(公尺)，加減佇
10%左右尚好‧保持定時運動：運動33制‧就是每禮物3擺，每擺30分鐘以上，會
當運動甲有流汗就會用哩‧﹝足百﹞山、走運動場、慢走、緊走、有氧體操、韻律舞
、泅水、騎跤踏車--，攏嘛是真好的運動‧
(5).什是低普林的飲食？
第一類：無限制攏通食‧牛奶佮伊的製品；五穀類﹝米、麵、小米、蕃薯、蕃麥、
竽仔、麥仔‧﹞佮﹝人因﹞的製品‧逐種新鮮的果子、青菜、植物油、動物油脂‧
其他像：豆油、糖仔餅、汽水、可樂、果汁等等‧
第二類：有稍可限制，﹝勿會﹞當食尚濟‧含有酵母菌的牛奶飲料，紅肉﹝豬、牛、
羊等等﹞白肉﹝雞、鴨、鵝等等﹞，腹內類﹝肝、腰子、胗等等﹞，佮任何的皮；
大部份的魚類海鮮類；豆仔類佮伊的製品；所以完全食素嘛有可能得到痛風啊！
第三類：發作時禁止食，普通時食愈少愈好‧蚵仔、三文魚﹝沙丁魚﹞、干貝、
細魚仔乾、蝦仔、四破魚、吻仔魚、虱目魚等等；發芽的豆仔類；蘆筍、蘆筍汁、
竹筍、香菇、雞湯、肉湯原汁、雞精等等‧
以上相關資料互逐個關心健康的人來參考‧
留言列表
