用藥保健~~~~~認識泌尿道感染~~~~~遊子
(1).什麼是泌尿道感染？
是因為泌尿道內面有致病菌存在，引起無爽快感覺的症頭叫做泌尿道感染‧
泌尿系統包括：腰子﹝腎臟﹞、輸尿管、膀胱、尿道等等‧
(2).造成泌尿道感染的因素：
女性致病率比男性卡懸，是因為女性的尿道卡短，尿道口離陰道口、尻川口又近，
卡會受到陰道分泌物抑是糞便所汙染到‧
性行為卡接的人抑是有身孕的查某人嘛卡會得到‧
致病率會隨著年歲增加來提升，主因是體內的荷爾蒙分泌不足，膀胱無法度正常完全
排空抑是長期的慢性病﹝親像糖尿病﹞‧
正常的泌尿道就有抵抗感染的能力，毋過，抑準抵抗力降低抑是泌尿道內有異物存在，
甚至塞著的現象，親像：有插入排尿管、泌尿道內有生腫瘤、結石等等，攏會引起感染
率的增加‧
(3). 泌尿道感染可能會出現什麼症頭？
接接想﹝要卜﹞放尿﹝頻尿﹞、尿卡濁有臭味抑是參有血絲仔、尿道口紅紅，放尿時感
覺燒候燒候甚至有刺疼的情形、有時陣會發燒畏冷，身驅會震﹝發抖﹞、放尿量減少而
且攏感覺放﹝勿會﹞清氣、下肚疼、腰疼、下背疼‧
(4).愛安怎來面對處理泌尿道感染？
愛緊去病院互泌尿科醫生看，提尿去檢驗，有時陣醫生會安排超音波等的檢查‧互醫生
對症開藥，才是正確緊好；毋通家己走去藥房買藥仔胡亂食，顛倒會誤著病症‧
(5).日常愛安怎來保健預防泌尿道感染？
保持身驅清氣，卡接換內衫仔褲，上好穿純棉質的內褲；平常洗衫的時，避免用漂白劑
抑是強烈的洗衫粉，而且上尾愛用清水洗互清氣；平時就愛注意家己尿量和尿色；去便
所了後，尤其是女性朋友，愛由前向後拭，就是由尿道口向尻川口方向拭去；陰道如果
有無正常的分泌物，愛緊去互醫生診斷檢查；男性朋友抑準無割包皮，每工攏愛注意包
皮內部的清氣；每工攏愛補充夠量的水份，寒天2000毫升，熱天2500-3000cc；性行
為了後一定愛去便所，將膀胱内的尿放互空；平常時保持2-3點鐘就放尿一擺，毋通因
為無閒就禁尿，禁甲歸半埔，安呢是無健康的習慣喔！
留言列表
