jimmycmlin的部落格

用藥保健~~~~~認識消化性潰瘍~~~~~遊子
現代工業社會，人人工作、生活攏真緊張，消化性潰瘍的人嘛愈來愈濟，什麼是
消化性潰瘍(Peptic ulcer)？咱來將伊認識著‧
(1). 消化性潰瘍的分類：
一般講胃潰瘍(Gastric ulcer)是發生佇歸個胃的內壁部份；十二指腸潰瘍(Duodenal
ulcer)是發生佇胃尾和小腸中間的十二指腸部份‧
(2).引起消化性潰瘍的因素：
愛食甜食、精神上會緊張，操煩攏會影響到胃酸傷濟，先造成消化性發炎﹝胃炎
gastritis和十二指腸duodenitis﹞，無治療就惡化變成消化性潰瘍，抑是搁無治療就
會轉變惡化做消化道出血(G-I bleeding)，就是胃出血和十二指腸出血囉！是有影響
到生命的危險喔！以前胃腸科醫生的聖言：無酸就無潰瘍(No acid no ulcer!)‧佇
15年前互澳洲的醫生推翻了，伊發現一種病菌嘛會引起消化性潰瘍喔！這種病菌叫做
：Helicobacter pylori(HP)；幽門螺旋桿菌‧佇公共環境衛生卡﹝禾黑﹞的地區所在
，這種菌引起的消化性潰瘍愈濟‧
(3). 消化性潰瘍的症頭：
頂腹度疼和消化不良是上接看到，嚴重的程度各人無共款；有時陣空腹、食飯前疼
，有時陣食飯飽後1-3點鐘的時艱苦；嘛有佇半暝仔發作‧艱苦發作的時，食一屑
仔物件抑是﹝口林﹞牛奶抑是食胃藥仔，攏會暫時緩解‧
(4).安怎面對處理消化性潰瘍？
有拄到前阿講到的症頭發作，當然是愛緊去互胃腸科醫生診斷檢查，有時陣愛照電
光(X-ray)、做胃鏡(Endoscope)檢查、歕氣檢驗有HP菌抑是無等等，才對症開藥
仔‧毋過，醫生嘛一定會交代，愛放輕鬆仔去做事、上班、過日子，上好愛加減做運
動，愛強喙﹝忌嘴﹞‧
(5).治療消化性潰瘍的藥仔處方：
診斷和開處方是醫生的責任，安怎樣用藥會當去問藥師，安怎正確用藥是藥師的責
任‧毋通家己艱苦就隨便去買藥仔食‧藥仔處方有：
a).降低攻擊性因子同時兼有增強防禦性因子的藥仔：M-阻斷劑、前列腺素E1的衍
生物‧
b). 降低攻擊性因子的藥仔：H2-阻斷劑、質子幫浦抑制劑、抗胃泌素劑、制酸劑‧
c). 增強防禦性因子的藥仔：一寡仔天然物抽出的成分劑‧
d).抗生素殺菌劑：主要是對HP菌‧
(6). 安怎預防消化性潰瘍的發生抑是復發：
有症頭發作時，愛照時間食藥仔，照時間轉去病院互醫生診斷檢查；飲食方面愛定
時定量，食卡清淡的；充分休息，保持心情輕鬆；避免食刺激性的食物，像：煙、
酒、檳榔、糯米類、酸、澀、辛辣、傷甜等等‧佇平常無病的時，嘛攏照安呢過日
子生活就對啦！