jimmycmlin的部落格

用藥保健~~~~~翁婿退休症候群(RHS)~~~~~遊子
日本自經濟泡沫破去了後，查埔人無頭路、無收入，造成一寡仔社會問題
，其中互人卡想﹝勿會﹞到的是：年紀大的老翁仔某離婚率愈來愈懸‧專
家研究，這就是翁婿退休症候群(Retired Husband Syndrome,RHS)‧
退休後的壓力，佇先進已開發國家地區是相當普遍的代誌，佇日本互人感
覺搁卡嚴重‧主要原因就是：日本人口內，65歲以上的老人佔5分之1，比
率是全世界上懸的，有真大的關係‧
老一輩的日本傳統查埔人，攏要求in的牽手愛對in事事順從、聽話，結婚
後mai上班，好好仔持家顧囡仔，茨內管理互好，規工留佇茨內，拄起頭，
親朋好友的來往差不多斷線去啦！後來才漸漸安排出新的社交生活；查埔
人家己顛倒透早出門，晚晚才轉來，搁定定lim到醉茫茫‧幾10年來，牽
手家己嘛慣習1個人過日子‧不過，翁婿退休了後，1工24點鐘2人做伙，
4目相對，顛倒2人攏﹝勿會﹞慣習，翁婿踮茨內親像日本俗語講的：大件
的糞埽(Sodaigomi)‧互牽手感覺真歹適應‧即種感覺轉變成身體的毛病
出來，有：胃潰瘍、精神緊張、規身驅攏無爽快，甚至出現憂鬱症，看醫
生可能cue無任何病症的原頭，這就是翁婿退休症候群(RHS)啦！
日本社會佇近20外年來的變遷嘛真大，退休父母和囝兒蹛做伙的傳統，已
經真緊就消失去啦！少年hit代一方面慢婚，一方面自我意識提高，卡自
私為家己想，無愛和父母蹛做伙，所以，老翁某無法度嘛就2人相看顧，但
是，查埔人的大沙文觀念，互2個老伴歹做伙，攏是面子和心內感覺的問題
，抑準會當互相尊重， 2個老伴是會當真好過人生的尾仔段才對‧
台灣的逐像項發展差不多攏綴日本行‧經濟科技方面啦！民生問題啦！社會
問題啦！差不多比日本慢20年左右出現，所以，前仔講到的問題：翁婿退休
症候群‧佇台灣嘛漸漸看到啦！女權佇台灣是提懸真濟，即馬，佇全世界嘛
排頭前喔！因為教育普及，教育程度提高，經濟獨立，查某人講話自然卡大
聲‧不過，逐家知影，查埔人的大沙文觀念毋好，共款的，查某人的大沙文
觀念嘛是毋好！咱嘛了解愛陰陽調和；俗語講：10年修得同船渡，百年修得
共枕眠‧共茨內毋免講誰驚誰，翁仔某會當互相尊重、體諒、照顧、信任，
就是愛的上高層啦！