新聞辭典~~~~~全球瘋Wii熱~~~~~遊子
最近電視台報導全球瘋Wii熱‧Wii到底是什麼物件啊？會使予全世界的人，無分查埔查某
、老人細漢囡仔、企業界大頭家、學生囡仔等等，攏耍甲放袂煞‧
Wii是日本任天堂(JinTenDon)公司開發出上新世代的電動玩具，自蘋果電腦(Apple-II)
開使，一直到即陣，電動玩具嘛綴著電腦的進步來調整改變，由早期的卡式、匣式、掌上型
的Gameboy、到連接茨內電視的PS-2、PS-3等等，上新世代的電動玩具Wii來出現啦！在
日本和美國攏搶甲欠貨，在日本市場1組主機和1片DVD光碟，售價是25000~30000日圓，來
到咱台灣市場的水貨是13000~15000箍，水貨嘛是搶甲欠貨‧到底Wii是有什麼迷人、siaN
人的所在？任天堂公司講Wii是適合5~90歲的任何人來耍，任何人只要來耍過1次以後，一定
放袂煞，想欲復來耍；看過身邊耍過的少年人講甲喙角全波，喙笑目笑講袂煞，一面講，一
面笑，又一面喝遮酸痛hia酸痛，實在感覺袂出來什麼滋味啦！
(頂仔是X-Box)
今仔日下埔有機會去查某囝的兜，in拄仔由東京買1組Wii倒返來，有這好機會當然要來親身
試看覓啦！有網球(Tennis)、野球(Base ball)、高爾夫球(Golf)、保齡球(Boling)、
拳擊(Boxing)，亦有其他的運動項目和真濟種類的電動耍法‧親身試看的趣味來講予逐個朋
友分享‧主要是和實際現場比賽的感覺有9成以上的親像啦！
親像網球比賽：有1人和電腦比賽的單打，有2人1組和電腦比賽的双打，規則完全照一般的比
賽的規則，裁判攏有英語出聲，”Deuce”幾次就幾次，出線、得分、換邊開球、殺球、封球
等等，電腦的對手嘛會流汗、歕si仔、怨歎，咱拍的人嘛是一直熱起來，手勢完全照在球場
共款，双腳嘛是正爿倒爿徙來走去，拍幾場後就phi-phe喘囉！手酸痛是一定會的啦！關節酸
痛，無注意時嘛有可能造成運動傷害喔！不過，臨場感是9成以上啦！
野球嘛是分做2隊，主角是投手(Picher)和打擊手(Bat)，咱耍的人和電腦比賽對換，規則嘛
是完全照一般的比賽的規則，有好球(Strike)、歹球(Ball)、3振(San Sin)、出局(Out)
、接殺、漏接、失誤、界外球、全壘打(Home Run)等等，實在趣味，臨場感是8成左右啦！
高爾夫球：球場的造型親像真的，球道、長草區(Rub)、沙坑(Banker)、水池、樹仔、果嶺
(Green)、出線外(OB)、木桿(Driver)、鐵桿(Iron)、推桿(Putter)、標準桿(Par)、
比標準桿減1桿(Birdie)、比標準桿加1桿(Boggie)等等，教你對方向，測試你的用力大小
；臨場感嘛是9成以上啦！
(頂仔是保齡球Boling)
上悿的是拳擊(Boxing)啦！2人對打，双手揮來揮去，撞挊甲頭暈目暗，滿天全金條，欲
sa無半條，體力用透就趴在塗腳，裁判喝：9、8、7、6、5、4、3、2、1、0，抑準爬袂起來
就算輸啦！抑是你拍贏，電腦派上場的選手會愈來愈強，看你的功夫有若厲害啦！2~3回合拍
煞，比起前仔的所有運動比賽復卡悿幾仔倍，2手的關節和筋肉隨酸痛啦！毋管是拍贏抑是拍
輸，無精差，平平悿啦！尤其年歲大的人實在袂勘哩啦！不過，臨場感是9成以上啦！
經過6~7點鐘猶原遮酸痛hia酸痛，聽講過1~2工嘛是猶原酸痛喔！不過，實在好耍啦！有影
會想復再耍，莫怪講無分查埔查某、老人細漢囡仔、企業界大頭家、學生囡仔等等，攏耍甲
放袂煞‧朋友，有機會恁嘛去試耍看覓，才綴會到時代喔！
留言列表
