jimmycmlin的部落格

新聞辭典~~~~~麻將(mahjiang)~~~~~遊子
媒體報導：頭1次在台灣辦理世界盃亞洲麻將比賽，連續3工的13只賽程，
上尾仔的排前4名，干哪1位查某爾爾‧一般台灣人是慣勢拍16只的麻將，
和國際標準13只的麻將是有淡薄仔出入‧
“麻將”(mahjiang)上早叫做”麻雀”，在中國因為地方腔口的關係，
在江蘇浙江地區叫做”馬吊”；伊的起源講法嘛隨人無共，有人講是3000
外年前，皇族王室的官員開始耍麻將，才流傳入民間；不過，較可信的講
法是：明朝鄭和下西洋時，因為長期在海上生活，下跤手人感覺每工日子
過著無味無素，實在無聊甲有賰，續尾有人激腦筋，想出麻將牌仔來消磨
時間，因為在大海中行船，用船隻頂的大索號名為”索”，用船隻頂的水
桶號名為”筒”，用船隻行走萬里遠，號名為”萬”，風帆受風向的影響，
號名為東西南北”風”，看到天頂的白雲，號名為”白板”，又想到故鄉
土地的花草，號名為”梅蘭菊竹”等等；這個傳說予人感覺卡合理，會當
來接受‧
麻將毋哪華人亦是亞洲愛耍，在歐洲、美國等嘛愈來愈時行愈熱門喔！所
以，發展出世界麻將組織(The World Mahjiang Organization)，是
由中國、日本、美國、德國、法國、丹麥、荷蘭等國家的人發起創議成立‧
想到以前，在茨內拍衛生麻將算是違法的事誌，有人去報，警察會來辦，
掠去派出所做筆錄罰款，有影時代無共啦！即馬，又有世界盃的麻將比賽，
予逐家在平常時會使安心仔練疊磚仔角，不過，為著家己的健康，絕對毋
通拍甲無暝無日無歇睏啊！媒體亦有報過：有少年囡仔就是按呢趴在桌子
頂往生去的不幸事件喔！