jimmycmlin的部落格

新聞詞典~~~~~救命吸管(LifeStraw)~~~~~遊子 2008.12.14.
佇世界散食落伍的國家，有清氣水通lim是非常寶貴的資源，因為全球差不多有1/6的人口一直攏無清氣水通lim，有超過20億人的衛生設備不足，每過幾分鐘就有1個人，因為lim到無清氣的水所引起的症頭來造成死亡‧
舊年得到時代雜誌(Times)評選為上贊的發明之一的「救命吸管」(LifeStraw)，為全世界欠缺清氣水通lim的散食人帶來希望。
「救命吸管」公司行政總裁弗倫德松(Mikkel Vestergaard Frandsen)講：
「救命吸管」就親像一般吸管共款，簡單又閣好用，使用的人將吸管插入去水底，續落去吸就會用哩。
伊表示講：生命吸管無需要修理亦毋免用電，會使佇地球上任何上複雜的環境來使用。每支「救命吸管」攏有佮圖解說明書。
救命吸管(LifeStraw)是使用7種過濾家私頭仔，包括有袂生sian的網絲、活性碳佮碘片等等，會使阻擋隔絕糞圾、病毒、細菌佮寄生蟲等等無清氣的物件。
上起頭是用2層袂生sian的網絲來過濾垃圾的物件，閣來用含有碘的樹脂會使thai5死 99.3% 的細菌佮病毒；上尾仔才閣用活性碳來捕掠賰的細菌佮病毒，確保處理好的水，伊的清氣度達到log7~log8，比世界上真濟先進國家的用水閣較清氣。
所以，不管若仔濟垃圾的水，攏會使利用按呢過濾消毒，變成會當lim的水質；閣較進一步來預防無清氣的水所引起的種種病症，親像：漏瀉症的霍亂、傷寒佮痢疾等。
生命吸管採用殺菌的樹脂，佇水通過救命吸管時，吸管內真濟混合的物件會當thai5死水內的細菌，過濾掉會引起漏瀉症的痢疾、傷寒佮霍亂等病症的有害微生物，每支吸管干哪賣差不多3.5箍美金 (差不多合新台幣100箍)‧
雖然看來是淡薄仔貴，不過，會使用 1年亦是過濾出700公升的清氣水，會使救著幾仔百萬條人命。
弗倫德松講：現此時每工有超過6,000個囡仔，因為lim到無清氣的水造成死亡，遮個悲劇應該會當閃避，救命吸管亦會使提供予地動佮風颱的災民使用。
用心佇改善全球清氣用水問題的國際慈善機構WaterAid， o-lo2救命吸管實在是真正予人想未到的發明，不過，嘛煩惱伊是干哪治標無治本。