jimmycmlin的部落格

台語文咱的台灣~~~~~來行桃園大圳~~~~~遊子
咱的台灣自清朝開始上出名的農業建設就是：璢公圳、曹公圳和嘉南大圳，
分別位在北部、中部、和南部，對農業的發展非常重要；後來在日本管理時
代，1916年開始起桃園大圳，在1924年起好完成，規模比前仔的3條大圳復
卡大，伊是有史以來台灣上大規模的現代水利工程，到今嘛是桃園縣上重要
的文化資產‧為著予在地人會使瞭解和認識伊的偉大功能，體驗先人開拓的
艱苦，所以，自1996年開始，在寒天冬節過了後，趁整修大圳，大圳底卡無
水時，開放予民眾深入去大圳內巡巡行行，參加的民眾1年比1年增加‧今年
規劃5.7公里的導水路來行‧
桃園大圳(Taoyuan canal)的水路全長達到2700公里，水路親像蜘蛛網，
分佈在台北、桃園、新竹等3個縣市，負擔著2萬外公頃水田的種作用水；80
外年來，一般人攏干哪會當看到地面流水的明圳，另外，有19公里外長藏在
地下的水路，除非是工作人員，抑無是無通深入去看‧這近20公里長藏在地
下的水路，是由石門峽通到八德大湳仔，以前是屬於機密所在，無開放予普
通人進出‧
在地下的水路親像行在磅空內，在內底真正是寒天燒熱天涼，深入去行保證
袂寒，真趣味復好耍，不過，圳溝底猶有淡薄仔水，上好是穿長管雨鞋，嘛
要攢手電仔，因為在內底歸路攏暗矇矇喔！只有磅空頭尾才見光，行在大圳
只有歸陣人的笑聲、講話聲、行路聲和流水聲，上尾仔行到出口看到光時，
歸身的悿攏拍無去啦！行完全程實在真有成就感，有價值啦！
桃園大圳有關工程的資料整理出來予逐家參考：
磅空造型：是馬蹄型，直徑有3.6公尺‧
進水井：1個‧
磅空長度：分做8段，總共長14087公尺‧
水橋：總共有5座，總共長200公尺‧
開渠道：總共開12段，總共長4053公尺‧
主幹線：總共有25376公尺‧
支分線：總共有18條，總共長14萬公尺‧
給水路線：總共有178萬8000公尺‧
儲水池：總共有241座‧
河水堰：總共有132座‧
其他和大圳有關的建構物：總共有1萬4233位的所在‧