jimmycmlin的部落格

莊子講(38)~~~做車輪仔的老人~~~遊子
有1工，桓公佇堂上看冊，做車輪仔的師父輪扁嘛拄好佇前堂做車輪仔‧歇睏時，輪扁就問講：
請問你讀的是什麼冊？
桓公應講：我讀的是聖人的經典啦！
輪扁又問講：按呢，作冊的聖人是毋是猶活佇世間？
桓公應講：這是古早人寫作的，早就無佇人世間啦！
輪扁講：啊！照按呢看，你所讀的什麼冊，不過是古早人的屁話爾爾‧
桓公聽到真生氣講：你講什麼痟話？你愛講出一個道理，亦無，你按呢胡亂講話，我就將你處
死喔！
輪扁緊應講：大王，請毋通生氣‧我這老伙仔是做車輪仔的人，就請予我用做車輪仔的經驗來
比喻解說：阮做車輪仔的時，落刀抑是緊，就卡省力，不過，車輪仔無法度真圓；落刀抑是慢
卡費氣，但是，車輪仔會當圓滾滾‧做車輪仔上好的技術是落刀無緊無慢，緊慢拄仔好真順手
就是啦！這是幾仔年久得到的經驗，我嘛無法度傳予阮囝和綴我學功夫的師仔，愛伊家己親身
體驗和感受，才有法度得到真正的功夫；所以，我已經70歲囉！嘛是繼續佇做車輪仔‧照按呢
看，古早聖人寫作的大道理無法度傳落去，甘毋是真清楚啊！所以講，你即馬所讀的什麼冊，
甘毋是古早人的屁話爾爾？
所以講，師父干哪會當教你圓的扁的規矩，無法度將伊本身寶貴的經驗傳予你；做木的、做土
水的、做車輪仔的、做桌椅的、拍拳練武的等等，攏嘛共款啦！讀冊的人，定定想講冊頂頭寫
的文字真可貴，其實，言外之義才是真正寶貴，才是冊的文字所暗藏的意思；抑是干哪會背冊
的人，無一定會曉讀冊，會曉讀冊的人，無一定會瞭解冊頂頭文字所暗藏的真正意思，這就是
叫人毋通讀死冊、讀戇冊的道理‧