台語文~~~太平山~~~遊子 2017.12.16.
又閣有機會入來到宜蘭縣太平山，斡頭想著頭一擺，一目[目聶已經是48年前的事誌囉！1969年受到生藥學教授指派，佮另外一位助教，佇歇熱時，綴著師大生物系的學生團隊，由師大生物系的教授帶領，生物系的學生是採集植物標本，阮是採集藥用植物先做標本以外，閣愛採集一定的量，匟入布袋內共仔有3~4種，準備帶轉去交付教授做實驗使用，看是毋是會當抽出有特殊成份來治療特定的病症。
會記得hit當時公路猶袂全通達，尤其太平山林場是自日本時代就是咱台灣三大林場之一，紅檜木、柳杉木等等，產量非常濟，為著運送剉好的木材下山，沿著山坪開造鐵枝仔路，將山區逐所在剉好的原木，先利用”蹦蹦仔”(就是後來咱所講的”蹦蹦車”，其實伊的正確原名叫做”山地運材軌道車”啦！)運到指定的集材所，集中後才分批利用”流籠”運送下山‧
一般”流籠”的纜鎍有兩條，一條運送原木由懸向低流送，利用原木重量帶動機械產生動力，將山跤的車箱扭往山頂，利用車箱來運送人員佮日常用品、工程材料部品等等，佇車箱內攏是用企的，好天的時陣，看來亦是非常方便；歹天時就較危險，所有人員是禁止搭用‧
所以，當時阮上山的時，總共搭乘3段”流籠”，分別是由海拔800公尺至1200公尺，海拔1200公尺至1600公尺，海拔1600公尺至1900公尺，上尾仔段已經竄入去雲頂囉！對阮頭一擺體驗搭乘的人來講，真正是非常趣味佮刺激啊！hit種滋味真正是終身難忘喔！後來閣來過太平山佚佗幾仔擺，因為原材木攏剉完啦！新栽的袂成材，林場廢場，公路建設亦拓闊直達太平山莊，”蹦蹦仔”佮”流籠”攏廢掉去啦！實在真正可惜！
綴著時代社會環境的變遷，太平山區轉型為休閒環境保護生態園區，吸引真濟人來遊覽佚佗，所以有維修一小段的鐵枝仔路，經營觀光用的”蹦蹦仔”(蹦蹦車)，歇涃日的時真ka-iah，太平山莊攏滿員，”蹦蹦仔”(蹦蹦車)的票亦是一位難求。原本的鐵枝仔路，亦攏改變為健康步道，有見晴懷古步道、檜木原始林步道、鐵杉林自然步道、翠峰湖環山步道、望洋山步道、台灣山毛櫸步道等等，只要跤路好就會當一條一條行看mai7‧阮即次兩工就行過3條喔！見晴懷古步道、翠峰湖環山步道佮台灣山毛櫸步道，佇濕冷9度~14度的濛霧天，路程中亦有凹塗，雖然有淡薄仔困難的挑戰，大部份的人攏行完，是有稍可仔悿，毋過大家亦攏真歡喜喔！
留言列表
