臺語文：信仰
佇咱生活中，隨時隨地攏會當看著無共的人，出入無共所在，拜神、祈禱、求福、懺悔、讀經、唸經、唱聖詩、誦經⋯等等.毋管是起著真嫷的尖塔造型的歌德式教堂，圓厝頂的清真寺，蔥頭型的俄羅斯教堂，日本清幽庭園的禪寺，華人社會的金光閃閃的寺廟、宮祠，深山內的草寮禪修所、印度教、西藏喇嘛教的佛堂⋯等等，予人踏入去著有一種莊嚴、敬畏、心內平靜的感覺。
面對無共信仰的神像：基督教的耶蘇、天主教的聖母瑪利亞、伊斯蘭教的穆罕默德、佛教的佛祖、釋迦摩尼佛，道教的神格化神像黃帝、關公、媽祖、濟公⋯等，攏是將歷史的賢人、修行者來神格化，無論叨一種信仰的神格化的神，頂一層攏一定有一個無形萬能的神，只是敬拜稱呼無共爾爾，有稱呼上帝、天父、阿拉、阿彌陀佛、玉皇大帝、天公⋯等等，無共信仰的任何虔誠信徒，佇祈禱、祈福、求助、懺悔求諒解自新⋯時，一定是呼喝上頂層的萬能神，抑是，攏無信任何宗教的無神論者，遇到困難無助、重大意外事件時，亦一定會頭夯起來，面向著天大喝：天公伯仔！Oh～My Gods ～！
佇社會中的眾生，酒色財氣，貪癡妄想，為非作歹，私心霸氣等等的引誘陷井，難免欲求內心的平靜殊暢，增加向善的力量，化解心內的憂鬱，將家己的心身靈提升，這時陣，宗教信仰是真好的管道，任何信仰出發點攏是引導信徒，透過讀經、唸經、祭拜、望彌撒、祈禱、靜坐等來沉澱心內雜念，澄淨深處思想，達到親善離惡。
一般信徒攏會親臨佈道會、法會、靈修會、打禪課程等等，由道行深的宗教者引領眾信徒；俗語講：師父引入門，修行看個人。所以，信徒本身亦愛經過長年累月的研讀經文、苦修、參悟的工夫，才會當落實佇日常生活中，佇繁華紅塵中，袂隨波漂流、起起落落，達到初心追求的目標，落實佇社會生活中。
選擇信仰是隨人的自由，毋過，目睭愛撥予金，絕對毋通變成盲信喔！因為全世界逐種宗教攏有真濟派別分流，亦時常看到有人居心不良，騙財、騙色，騙甲予信徒家破人亡，妻離子散的惡例是袂少，按呢是有信比無信閣較慘！
所以，咱愛瞭解信仰原本就是生活的一種方式，尊奉逐種戒律、儀式、禮節，攏是真好的心身訓練，無神論者亦是共款，佇生活中用虔誠的信念來待人接物，為人處事將心比心，問心無愧，行著家己的人生路.
親像俗語講：舉頭三尺有神明。
留言列表
