jimmycmlin的部落格

咱的台灣~~~~~油飯的習俗~~~~~遊子
報紙寫著：飼養黃牛的主人，因為牛母連續2年攏生出母的牛仔囝，真歡喜來還願，
請茨邊頭尾來食油飯；真濟人講食牛仔囝的油飯是頭1次，真趣味真特別‧
其實，請食油飯嘛是咱的台灣特殊的習俗，照一般民間的習俗，在囡仔出世的第3工
叫做”3朝”，細漢嬰仔由阿母亦是阿媽抱去神明和祖先桌前祭拜，而且要攢雞酒和
油飯，向神明說謝，予母子平安順序，同時予祖先隻影有新的後代序細來平安出世囉！
祭拜後，在第12工亦是24工的時選1工，要準備油飯、雞酒、金、炮、燭等等，派人
帶去產婦的外家報酒亦是報喜啦！予產婦的老爸老母知影復加1個外孫囉！
另外，嘛會準備油飯、雞酒送予媒人，雖然俗語講：做媒人保入房，無保一世人，嘛
無包生囝‧即馬順序平安出世，總要答謝媒人gau牽成，分享嬰仔出世的歡喜；禮俗
是有來有去，所以，外家茨嘛要準備活的雞、米酒、紅包、金子、嬰仔衫、紅龜粿和
其他補品等等，回送去予囝婿‧
會選油飯是因為古早經濟無好，生活物質欠缺不足，平時有白飯通食就算真讚啦！所
以，逐家見面相借問時，”食飽未？” ”食未？”是上捷聽到的話，抑是油飯是復
卡稀罕的物件，是拄到特別的日子亦是需要祭拜時才有攢啦！俗語嘛有講：9頓米糕
無上算，1頓泔糜仔拾起來囥‧這是在講大家新婦的問題，米糕和油飯是共意思，不
過，米糕有甜的和鹹的，油飯干哪鹹的爾爾‧
古早保守老1輩的人攏重男輕女，所以，茨裡生查埔嬰仔才有請食油飯，生查某嬰仔
上濟是請食雞卵糕爾爾‧即馬時代變遷，逐家觀念無共啦！尤其咱台灣嘛綴著少子化
的世界時行，逐家愈生愈少，毋管生查埔嬰仔亦是查某嬰仔，歸家伙仔攏嘛真歡喜，
攏嘛惜命命，所以，攏共款請食油飯啦！