台語文~~2006美西探親旅遊記(7)－jimmycmlin的部落格

台語文~~~~~2006美西探親旅遊記(7)~~~~~遊子
來到舊金山華人城(China Town)有影大，幾仔條街仔路攏是華文招牌、漢字看板，茨頂的旗子有美國
國旗、台灣國旗、中國國旗，毋是幹哪1~2支爾爾喔！表示華人佇這的政治立場嘛是有無共款，不過，
看in隨人企隨人的旗子，攏互相尊重包容，相安無事，日子照常過‧這實在是真好的現象，在咱台灣無
共立場的族群團體，有需要好好仔學習‧在加州多元族群比台灣更加複雜，除了原本的印第安人以外，

早期的英國人、法國人、歐洲其他各國的人，後來的華人、日本人、韓國人、越南人、泰國人、意大利
人、墨西哥人等等，等於世界族群的大融爐，但是，無管來自任何國家地區所在，一旦踏入美國的土地
，提到居留權亦是公民權，攏一定愛惜這塊生活的土地和效忠這個國家，雖然，生活上會隨人保持原本
母國的習慣傳統方式，平常時一定互相尊重包容，有事誌發生時，親像：天災、人為意外、戰爭等等，
所有族群一定尻川kioh做伙，團結一致來救災抑是對外‧即點正經是咱台灣無共立場的族群團體，一定
愛好好仔學習做到，台灣才有好發展、好未來‧

哪行哪看街景，踮遮完全無感覺是在美國，只有買物件時算美金才感覺是在美國，導遊揣人去食港式飲
茶，阮無綴，阮愛自由行，腹肚嘛咕嚕咕嚕叫，看到有人在排隊出出入入，一看拄仔好是賣燒賣(3粒/
1.2箍)、鮮蝦餃(3粒/1.2箍)、牛肉餃(3粒/1.2箍)、肉包(3粒/1.2箍)、叉燒包(1粒/0.7箍)、粉腸
(2份/1.5箍)、豆沙包(3粒/1.2箍)、花捲(3粒/1.2箍)、饅頭(3粒/1.2箍)等等；照一般經驗人濟表
示物件鮮、口味讚、價數實，就按呢，阮嘛參入去排隊囉！看板攏是漢字，價數是美金，買賣華語攏會
通‧買好坐佇邊仔隨試滋味，有影料實在，口味好，算起來嘛俗啦！順續加買幾粒準備做中晝頓；繼續
行，有像台灣傳統市場的菜攤位、果子攤位、燒雞、臘肉、南北貨的雜貨仔店，銀行、珠寶店、冊店、
針灸、跌打損傷等等；阮又買1隻玫瑰燒雞(2.8箍)和淡薄仔果子參做中晝頓‧算算阮2人的早頓和中晝
頓才開10箍爾爾，比起食合菜餐1人8箍，省真濟喔！

(頂仔就是智慧型無人化商店)
9:20準時離開舊金山，即次的遊覽行程攏結束啦！續落專程落南轉去洛杉磯，預定愛7~8點鐘，超過
700公里遠，比基隆到墾丁復卡遠，美國土地實在寬闊、實在大‧行山線沿途看到的是大大片平洋，一
行4-5點鐘闊，比起咱的嘉南平洋大幾仔倍，農作物種植攏是共類的一大片，由這爿看無到迄爿，看到
工人在田園親像一個烏點爾爾，所有穡頭差不多攏機械化、定時自動噴水，人工是無濟，莫怪成本會當
降低真濟、真省本‧

中途幹哪歇2次，第一次的休息站設備真簡單，只有便所、休息區和自動販賣機爾爾，無人在hia管理；
第2次的休息站有小型超市和提供賣食的店，不過，只有漢堡(Hamburger)、披薩、冰淇淋和飲料等等
；比起台灣和日本的高速公路休息站，差濟啦！尤其國道二號福爾摩莎高速公路的清水休息站，無輸百
貨公司的美食街耶！附近景色嫷，景典好右是賞月的好所在‧