台語文~~2006美西探親旅遊記(8)－jimmycmlin的部落格

台語文~~~~~2006美西探親旅遊記(8)~~~~~遊子
在等Eric san時，看這個小型購物區(Shopping Center)，真方便的停車場，順發超級市場(San Gabriel
Supermarket)是華人經營，天仁茗茶、阿里山高山茶、烏龍茶、真濟和台灣相共的商品，世界日報(聯合報系
統)和其他華文日報聽邊仔人是講華語、台語、廣東話等等，照講﹝勿會﹞曉講英語的人，佇遮買物件嘛無問題
啊！另外有越南菜的餐廳、速食店、洗衫店、百貨店、文具店、冊店等等，日常生活需要的攏無困難啦！即種
小型購物區，在美國差不多攏是按呢，復來就是大型購物中心(Shopping Mall)，有大型百貨公司連鎖店、
逐所在無共口味的美食餐廳、遊樂場、電影館等等，親像台灣已經引進的：台茂、大江、美麗華、京華城、微風
廣場等；因為美國土地大，是採用住商分離，感覺上住宅區環境品質卡好；台灣土地細人口密度懸，是採用住商
混合，予人感覺卡吵雜混亂，不過，生活上卡方便；各有好處和不便的所在，只要蹛久慣習就好啦！

暗頓由Eric san全家招待阮去另外一個購物區的日本料理餐廳，經理聽到阮講台灣話就講：啊！台灣來的
，請來坐貴賓室(VIP Room)‧予阮聽到感覺真溫暖親切‧在貴賓室歸陣人講話開講卡方便自在‧查某囝
Rachel下班後嘛趕緊來會合，已經有1冬外無看到囉！雖然，網路發達、國際電話嘛俗真濟，定定保持連
絡，不過，會當面拄面來相見，當然真歡喜啦！Rachel來美國拄拄仔好滿3年，當初出國在機場，正是台
灣受SARS影響著上厲害的時陣，中正機場(CKS Airport)旅客非常少，旅客需要戴喙掩(華語講口罩)，
量體溫；真緊3年過去啦！這3年來，Rachel受Eric san全家真濟的幫忙照顧，予伊卡緊來適應美國的生
活，實在真感謝Eric san全家，大恩不言謝，點滴在心頭‧下暗的餐會是這幾工以來食上好的料理，感謝
Eric san全家的招待‧

大洛杉磯地區真闊，由Eric san的茨去到Rachel蹛的所在，駛車差不多40外分鐘，又是無塞車，所以，
這個距離差不多是基隆到桃園啦！在台灣一般人會感覺真遠，在美國一般駛車1點鐘以內的車程攏是真普通
啦！美國的高速公路系統自早就非常發達完整，到即陣猶原共款，在大洛杉磯地區的捷運系統無像台北赫
便利，只有上班族使用爾爾，連Eric san嘛講伊猶毋bhat坐過捷運，一般人猶原以汽車做為交通工具，
茨內一般攏是1人1台車，機車真少，有看到的嘛是重型機車，500CC迄型，會當駛上高速公路系統喔！這
幾工在高速公路有看到幾仔擺；在美國無車就親像無跤，莫怪真濟台灣來的阿桑，來美國蹛囝兒親友的茨
時，囝兒親友上班出門後，只有關在茨內，叨位嘛無法度去，感覺親像在坐監獄耶！這時陣就會想到台灣
的方便啦！國情生活習慣無共的關係啦！