台語文~~~~~2006美西探親旅遊記(9)~~~~~遊子
透早5點外就醒來，坐起來看電視，即區域只有1台華語台、1台韓國語和1台西班牙語，其他攏是英語，
電視上的購物台共款真濟，嘛是廣告著真厲害，看著卡親切的節目猶原是在台灣有加減看到的：CNN新
聞台、NBA籃球比賽、Discovery等幾台；房間內設備有燒氣無冷氣，表示這所在緯度比台灣卡懸、倚
北爿卡冷‧宿舍無講真大，兩個人做伙猶算好，2間房間，另外，餐廳、灶跤、衛生間公家使用，社區
環境和治安問題攏算卡好，不過，租金有卡懸，為著蹛著卡安心、舒適，是需要的選擇，任何事誌總是
有一好無兩好‧9點半才欲出去食飯，先對伊的社區環境來參觀，有游泳池、撞球室、室外烘肉設備、
自助式洗衫間，室外花草嘛種著﹝勿會﹞bhai，予人感覺真恬靜、清氣、爽快‧
Rachel cua阮去到一間美國式餐廳，可能是禮拜六歇睏日，餐廳內真濟家庭式的人客，老人、囡仔攏
有，菜色一人一大盤，差不多逐項攏有起斯(Cheese)，色、芳、味具全，Rachel講這叫做早午餐
Brunch，是Breakfast和Lunch兩字合做伙，食的時間在早起10:00~11:30中間，意思是1頓準做2頓
啦！所以，Rachel叫阮愛食予飽‧其實，在台灣有聽過Brunch，不過，無真瞭解，原來是按呢‧阮食
飽時近11點，心內想講中晝頓是幾點才欲食？但是歹勢開喙，後來有影是中晝頓省起來，直接食暗頓
啦！
續落來坐點外鐘的車去到海邊的市Santa Monica，加州古早予西班牙人先佔領過，後來美國和墨西哥
相戰，墨西哥戰輸，加州換成美國管轄，所以，真濟地名攏有西班牙語的發音、語調，嘛留著真濟西班
牙人的風俗習慣‧停車場是3點鐘以內免錢，為著拼觀光，扭觀光客，市公所的停車政策真搭心喔！
海邊有起一座柴板的人行橋式步道，禁止駛車入去，邊爿是紀念品店、攤仔位、餐廳，步道邊爿邊仔有
真濟街頭藝人在表演，有唱歌、彈琴、演魔鬼、速描、彩繪、功夫技藝等等，看完表演加減愛寄付淡薄
仔銀兩‧遊客非常濟，真正是五色人攏有；想到咱淡水新的漁人碼頭有相共，只是無五色人啦！雖然出
大日頭，但是海風一陣一陣吹來，予人﹝勿會﹞感覺熱‧
續落去徙西班牙式的古街路，嘛是禁止駛車入去，算是人行的專區和街頭藝人在表演，前仔看到的表演
差不多共窾，另外有模仿NBA球員的籃球表演，圍著真濟遊客的欣賞；路邊的攤仔位和商店嘛真濟，遊客共款踢倒街‧只是物件價數無俗，可能是觀光區的關係啦！
看看實在無什麼通買‧
離開Santa Monica，一路開返Torrance，斡入去Shopping Mall參觀，因為台灣已經有類似的Mall
，所以，稱採參觀看看，不過，名牌的商品有拍賣時，是真正俗卡濟，親像牽手買1個Coach包包仔，差
不多NT$9000外箍，返來台灣後，看到東森拍賣網特價NT$24900，實在差濟喔！
晚頓，牽手講毋bhat食過美國牛排是什麼款？Rachel就揣阮去1間正統的美國牛排餐廳，生理真好，等
有15分鐘才有空位；3的人點2人份的餐點，食﹝勿會﹞完又通包返茨，即點美國人真習慣，食無完的物
件攏會包返茨，算是儉省的好習慣；Medium的牛排提上桌頂看著紅絳絳，親像猶有血水欲滴落來，不過
，入口隨融落喉，滋味真好，2片大塊牛排攏解決啦！上尾仔的雞卵糕嘛是看就飽囉！順續包返茨‧總算
食到難忘的美國牛排‧
全站熱搜
留言列表
