台語文~~~~~2006美西探親旅遊記(10)~~~~~遊子
共款在4點外就醒囉！天猶未光，驚吵著室內的人，就提出在中正機場買的冊加減看，圖解台灣史和投
資理財方面的冊，一看就是2點鐘，圖解台灣史是配合圖片來述說台灣史，簡單明易來認識和瞭解咱台
灣自早以來的歷史，另日才來專程紹介予逐個分享‧今仔日猶原9點過才出去食Brunch，牽手講美國麥
當勞(MacDonload)和台灣毋知有相共無？Rachel就揣阮去麥當勞，外觀設備看起來和台灣差不多，
伊是世界性公司，有一定的標準作業程序(SOP)，不過，點好餐點，等候時間親像比在台灣卡久，價數
嘛比台灣卡懸，但是，做法和口味有淡薄仔無共‧
續落來嘛是點外鐘的車程，來到美術博物館Getty Center，這是和赫斯古堡共款，攏是大企業家賺錢
了後，回饋予社會，這是真好的社會行為，並毋是將財產攏留予後代囝孫，對社會奉獻顛倒會當留芳百
世‧欲入去Getty Center參觀毋免門票，只要開停車費7箍，實在予人真意外想未到‧來參觀的人真
濟，嘛是五色人攏有，愛先坐電車進入去主要建築物區，是在一個細個山坡頂‧
一落車就看到幾仔棟的白色參有玻璃窗的建築物，每棟的外型起法設計攏無共，有大塊大理石、花崗石
、安全玻璃、彩塞玻璃等等；室外的庭園設計真特殊，有噴水池、流水池、小瀑布、細條橋和溪水等等
，予人感覺清涼有生氣活潑的感覺；另外有刺球(仙人掌)專區、植物迷陣、各式各樣的花卉、花草、大
細叢的樹仔、造景涼亭等等，在懸頂會當清楚看到遠遠的摩天大樓區、高速公路上川流不息的車陣，在
四樓懸挑空的食涼歇睏所在，視野真闊真好，種種的規劃設計予人感覺真舒適，比起赫斯古堡的古典式
，Getty Center卡有現代的情境感覺，是無共的意境‧每一個角度、每一個景攏想欲留落來做紀念，
好佳在是用數位相機，抑無就愛開真濟底片囉！想到舊年去北海道時，帶傳統相機，第一卷未攝完就故
障，害阮沿路買簡易相機，又毋敢胡亂攝，全程攏儉儉用，一次得經驗就夠啦！這次準備卡周全，會當
放心仔做阮攝啦！
室內展覽的古蹟真濟，嘛分做幾仔區域，有建築專區、畫作專區、日常用品專區、地毯壁毯專區、美國
歷史記錄專區等等，如果認真來參觀，1工的時間一定無夠啦！所以，園區內總共有3個提供簡單餐飲歇
睏的所在‧親像畫作專區展覽的攏是真跡作品，有莫內、焚古等歐美出名畫家十幾位的作品，大部份是
120年~200年前的作品，每幅攏是真跡作品，非常難得的欣賞機會‧其他專區的展覽嘛攏有歷史喔！像
法國路易幾世的皇室用途嘛真濟，真正予人看到尾仔目睭花花啦！室內的任何物件攏禁止攝影，逐家嘛
攏真守規矩，無人違反‧即種公德心守規矩的精神，值得咱台灣人在國內好好仔學習和做到‧
下暗準備蹛欲Eric san的茨，行李綴阮同齊過去，因為明仔暗就愛去機場囉！暗頓又是予Eric san招
待，去華人開的海鮮料理餐廳，Eric san的公子Jess和伊的女朋友Nina嘛做伙，Nina是中國上海姑娘
，生做真標緻，和Jess嘛真適配；大毛蟹、大粒蚵仔、大粒蛤蜊、生干貝、海參、紅燒細尾雪魚和雞湯
堡等等，有夠滂湃啦！頭仔3工像佇減肥，尾仔3工愈食愈好，體重一定增加囉！餐廳滿員，生理好物件
一定鮮，口味嘛讚，不過，價數看來是無俗的款‧食飽Rachel家己返去Torrance，阮就直接去Eric
san的茨啦！行李款款著，行程差不多近尾仔聲囉‧
留言列表
