台語文~~~~~2006美西探親旅遊記(11)~~~~~遊子
早起猶原是食Brunch，是美國菜式的自助餐(Home Town Buffet)，菜式共款真濟款，隨人甲意隨人提，
每工的菜式攏有稍可仔變化‧今仔日，本來欲去洛杉磯市區(Down Town)和環球影城徙徙遊覽，不過，拄
到全美國的非法移民激歸陣在各大都市遊行抗議，包括紐約、洛杉磯、舊金山、丹佛、西雅圖、芝加哥等
等，總共幾仔百萬人喔！欲爭取變成合法身份的移民，其中墨西哥人上濟，其他各國的人嘛有；所以，洛
杉磯市區和環球影城附近透早就塞車，人真濟，電視嘛現場隨時轉播放送；Eric san講換來佛光山西來寺
和西來大學遊覽看看好麼？無法度嘛只好換所在啦！
佛光山是星雲師父所起的，名聲透全台灣，擴大到美國的洛杉磯和澳洲的雪梨(Sydney)；來到西來寺，伊
的山門和大雄寶殿起著非常雄偉壯觀，寺方拄在舉行慶祝浴佛節的活動，阮一行4個人嘛輪流參與慶祝浴佛
節的活動，用水杓仔kat花池的清水，淋在金身佛祖的身上，才復拜拜祈求平安；寺的四周區域環境清幽、
恬靜，聽講信徒真濟，嘛有辦理返去台灣朝拜省親團和台灣信徒子女來遮的夏令營，寺外後面的區域，規劃
做玫瑰陵，1位風水位幾仔萬美金，價數無俗喔！寺內嘛有賣佛教相關用品，服務的人強調所賣的物件攏經
過加持；另外，齋堂、齋舍具備；寺外亦有起茨來販賣，買茨的人想講會當和師父做茨邊，卡有佛緣，茨價
嘛是無俗‧由這種種看起來，做法猶原和在台灣相共款，進行宗教的教化以外，真有生理的腦筋，又配合時
代做著企業經營‧和慈濟系統的作風無共，風評怎樣總是隨人的看法啦！
續落斡去西來大學，西來大學對在台灣的學生囡仔，是有淡薄仔知名度，不過，看伊的校園無大，Eric
san講性質稍可仔親像台灣的社區大學，因為會當簽發學生簽證(I-20)，所以，台灣和東南亞國家來的學生
算﹝勿會﹞少‧
續落去Eric san in蹛附近(El Monte)的Mall徙徙看看就返去in兜歇睏，等Rachel來會合，因為禮拜一
公司卡無閒，Rachel歹勢請假歸工；Eric san的茨自買到今嘛漲價一倍外，環境整理著真嫷，原本種幾仔
叢果子樹，金棗、甜桃、龍眼、拿菝仔等等，最近欲起新茨，整理後庭，剉掉部份；門前的桂花真濟又真芳
，多采多姿的玫瑰花真大蕊，可能土地肥天氣好，才有法度開著赫大蕊；in查某孫Serena真聰明乖巧又古
椎，是in全家的開心果和甘草‧當初來的時，後生Jess和查某囝Bet猶細漢，即馬嘛攏有真好的頭路，少年
人攏已經融入去美國社會的生活方式囉！
送別餐會在另外一間大型Mall的日本料理餐廳，菜色卡正統又濟類，卡高價的親像：海膽(Uni)、魚仔卵醬
、中型龍蝦、大隻劍蝦、北海道的蜘蛛蟹等等，花樣變化真濟的壽司(Sushi/Nigiri)、印度薄餅、拉麵、
逐式甜點、水果等，逐個食著真歡喜；這次輪由Rachel做東，回請逐個，嘛算是難得的機會‧
最後返去Eric san的茨載行李，向in歸家夥仔說謝和會別，後次有機會才復來攪擾，嘛歡迎in返來台灣，
尤其Tammy嘛真久無返來台灣啦！阮由Rachel送到國際機場，車程需要50分鐘‧自”911”恐怖攻擊事件後
，入美國的簽證嚴格，出入美國國土的檢查嘛真嚴格，一般是2點鐘前辦check in就好，在洛杉磯愛4點鐘
前辦理，抑無，有可能行李猶未檢查好，原本訂好的機位因為客滿予航空公司取消去喔！一路有Rachel相陪
伴卡安心，辦理好就和Rachel講再會啦！母女相攬講細聲話、雖然真毋甘，但是，天下總是無不散的筵席，
只有期待再相會啦！
入關時人身檢查猶原真嚴格，外衫、腰帶、任何鞋仔類、手錶等等，攏愛蛻落來；為著飛航安全，逐家不得
不全力配合啊！機場內的免稅店無濟，比起中正機場差濟啦！不過，並無準備特別欲買什麼物件，只是稱採
看看，準備登機返台灣！
留言列表
