台語文~~~~~2006美西探親旅遊記(完)~~~~~遊子
飛行機準時起飛，洛杉磯的市區燈火愈來愈霧啦！再會啦！洛杉磯‧即次復來拜訪遊覽和頂次差17年，
後擺復來又毋知愛隔若久？莫怪有人講：世界共款的所在，以佚佗、遊覽的角度，一生會重遊去2次的
機會是真少‧除非是特別的所在，講起來實在有影啦！
回程的飛行機差不多大，不過，座位卡少，可能一寡仔空間換去載貨囉！機長放送：台北是落雨天，預
定飛行時間13點半鐘‧啊！比來的時加2點鐘，可能是順風、逆風的關係；在機場劃位時﹝勿會﹞記得
拜託劃倚走道邊，有事誌出入座位時卡免麻煩別人，即馬是倚創仔邊，抑是驚麻煩，就卡忍耐著‧沿途
總共放3~4齣電影片，食2頓正式的機上餐和1次的泡麵，水份愛隨時補充予有夠，嘛愛撥時間起來行振
動，卡﹝勿會﹞長期間坐著，血管循環無好，引起飛行的意外；機上總是嘛愛加減落眠，抑無，到台灣
時是透早﹝勿會﹞當睏‧時差問題拄仔調好，返到台灣隨愛復調倒轉來，莫怪會悿啊！
順序返來準時05:45.降落中正機場，實在講咱的海關嘛進步真濟啦！客氣、尊重和方便，可能行李在美
國已經檢查真嚴格，咱的海關免復檢查就會當出關，實在方便啦！大查某囝、囝婿和屘查某囝攏來迎接
，予阮兩個老的真歡喜‧快樂的出門，平安返來茨‧
即次的探親旅遊是有感覺時間上卡趕、卡短，無要緊，以後慢慢仔來規劃增加，總是趁身體勇健有法度
行的時，滿叨位行行遊覽看看，尤其有老伴做伙同齊，更加是愛珍惜的機會‧即次其他建設文化等免講
，上大、上深的感覺是：美國真正自由、民主又有法治的國家，族群複雜的情形比台灣復卡厲害，但是
無共族群的人，毋管來自世界的任何國家、地區所在，一定互相尊重，一定認同所蹛的新土地，一定效
忠所屬的新國家‧一切的爭議上尾仔一定以國家利益排頭前‧這是目前咱台灣上欠缺，上需要學習做到
的重點，逐家為台灣這塊土地來團結拍拼，予後代囝孫有好將來！出去行行看看比較，咱台灣是比上不
足比下有餘，不過，猶原是好所在！猶原是寶島！咱所有蹛在台灣的人，一定愛珍惜、保護台灣這塊土
地！認同、支持、效忠台灣這個國家啦！
留言列表
