jimmycmlin的部落格

用藥保健視雪症遊子 2010.09.20
最近網路上討論著視雪症的症頭予人真驚惶,到底視雪是什麼?
視雪症[Visual snow]是美國醫師佇1983年新發現的1種病症,伊真親像咱所知的飛蚊症,親像的程度達到9成,毋過,伊並毋是由玻璃體變成混濁來引起,並毋是
屬內視現象,所以,佮飛蚊症完全無共款,當然毋是飛蚊症‧
佇咱國內合理的估計,有視雪症的患者應該袂少,只是有關的資訊真正少,予得到視雪的患者攏陷入求醫無門,求救無望的痛苦中‧
佇門診時,視雪的患者會講:伊一眼就看到非常濟非常濟的小烏點,有時換做小白點,佔著眼內視野的一部份,較嚴重時規個視野滿滿是,感覺真親像飛蚊症,佇眼前飛來飛去,有時親像落大雪,雪花1片1片飛,嘛親像咱平時所看的電視無信號時的畫面,所以,才號做視雪症‧暗時看烏暗的天頂閣較明顯,目睭閤起來時嘛看會到,嚴重時規工攏看會到‧
視雪症患者的視力檢查可能正常,毋過,看物件時感覺視線有予什麼物仔遮著,看冊感覺較食力,有時無法度順序來閱讀‧患者有時嘛會合併出現其他症頭,親像:畏光、眩光、耳仔吱吱叫、頭暈、目暗、頭痛、虛幻感、性格改變等等‧
醫療界到今猶無揣出正確的原因,病母有可能是:眼球內異常、偏頭痛發作的前兆、視覺神經受刺激、神經的幻覺等等‧如果是幻覺,真可能佮食毒、食迷幻藥有牽連,有人只食過1擺迷幻藥爾爾,續落到幾年後才發生視雪症;迷幻藥以外,抗生素、治療憂鬱症的藥物、提神的興奮藥物等等,嘛予人發現會出現視雪症喔!
因為真正病母猶揣無,病因不明,當然嘛無法度有正確的治療方法,目前除了藥物的對症療法以外,配合適當的心理輔導,亦會使來改善病症‧
如果有嫌疑是視雪症得患者,應該先去看眼科門診,予眼科醫師檢查,抑準確實患者的眼底正常,就會當安心啦!排除飛蚊症,袂造成視力障礙;續來會使換去看神經科亦是精神科門診,來改善相關症頭,猶原有機會通治療好,免緊張、免煩惱、mai3悲觀啦!