祭 母 文~~~懷念阿母~~~後生查某囝ㄧ同 2010.05.10.
阮慈祥敬愛的阿母，佇舊曆2月24日丑時離開阮，綴佛祖行去囉！全體家族當然非常毋甘，大家忍著心內的悲痛，圍佇阿母的身邊念佛號：南無阿彌陀佛、南無阿彌陀佛、南無阿彌陀佛------‧連續8點鐘無停，溫馨肅穆莊嚴的佛號，嚮望予阿母會當放下一切安心仔綴佛祖行。
阮慈祥敬愛的阿母林郭月珠，是在地桃園人，自細漢為孤，讀公學校時就綴阿舅蹛佇中壢，哪讀冊哪做穡頭，阿舅代理父母責管教真嚴，公學校卒業就全心佇茨內幫助做家事佮做生理，亦是因為自細漢拍落來的基礎，予阿母的算數、手藝功夫、對代誌的判斷決定、做穡拍拼有責任感等等，攏是一粒一的。
阮阿母佇19歲時由阿舅做主，佮22歲的阿爸結婚成家，20歲時佮阿爸2人佇桃園公館頭創業”日春建材行”，一直到今已經有71年的歷史‧阿爸主外，認真拍拼做生理賺錢，阿母佇茨內顧店面、奉待序大人、教育阮兄弟姊妹大大細細，予阮無變成歹囝，又閣飼豬、飼頭牲仔，配合阿爸勤儉，亦以勤儉來教示阮兄弟姊妹‧顧好後頭予阿爸免煩惱，嘛佮阿爸共款，待人以禮，和氣生財，嚴以律己，寬以待人‧俗語講：翁某會共心，烏塗變成金‧因為阿母佮阿爸的共心拍拼，予建材事業順序發展，佇民國45年踮現此時的所在，起著3層樓懸雙店面的店樓‧遮亦是阮全家和樂成長，甘甜記智的所在‧阿爸在生亦有交待講：恁今仔日所看會到一切，有一半是恁阿母的功勞喔！恁毋通放未記得！
阿母佮阿爸對序大人有孝，對兄弟姊妹有情，對茨邊隔壁有愛，對學校教育佮社會善事的捐獻，攏嘛輸人毋輸陣；為著囡仔的教育，學校的活動親像：母姊會、運動會、家長會等等，閣較無閒嘛一定會撥工全程參加；亦陪伴阿爸佇桃園國際獅子會，有頭有尾，出錢出力，為社會事盡著社會人的責任，這亦是予阮序細做好tshua7-頭、好模樣。
因為有阿母的用心，予阮的家庭美滿和諧，雖然，真有行威的阿爸予阮較毋敢接近，毋過，阮兄弟姊妹所有重要的代誌，攏是透過阿母來交涉轉達，閣較困難的代誌只要阿母出面，攏一定無問題啦！這亦親像今年母語得頭名，上嫷的一句話：免驚，阿母佇遮！嘛因為有阿母的用心，予阮的家族愈來愈旺愈濟人，阿母亦做祖囉！
阿母佮阿爸予阮兄弟姊妹的家訓是：自立自強，勤儉持家，翁某共心，家和萬事興‧阮兄弟姊妹亦攏繼續傳承落去，來教示阮的後一代序細，予這個好門風一代傳一代，一直到永久，用按呢來懷念阿母才是有意義的啦！
阿母，慈祥敬愛的阿母，你佮阿爸予阮的教示，阮一定未放未記著，嘛一定腳踏實地照著做，一代傳一代，一直到永久，請你放下一切，安心仔綴佛祖行。
阮感謝你，阿母！阮感謝阿母佮阿爸！
阮懷念你，阿母！阮懷念阿母佮阿爸！
留言列表
