(頂仔是黃理事長)
台語文~~~~~鹿港王功遊(2)~~~~~遊子
漢人由唐山過烏水溝到台灣，自早講”一府，二鹿，三艋舺‧” 二鹿就是鹿港，可見以前有若仔鬧熱、好
趁食；即馬，環境變遷，換行觀光旅遊路線，小鎮的街仔底，古蹟真濟、百年老店猶原生理好、名產、工藝
品嘛留存落來，值得好好仔來瀏灠，其實阮嘛來過2~3次啦！猶原會想欲復來看看‧
(頂仔是八卦藻井)
天后宮就是媽祖廟，起自明朝萬曆19年(西元1589年)，已經有四百外年的歷史囉！經過無共朝代信徒的整
修，一直保留到今的形樣，香火總是旺旺旺；石柱、八卦藻井、周圍各式各樣的雕飾，手工幼，形體有神，
真正是珍貴的藝術品‧每年新正時，附近的路全全是信徒、香客和遊客，在路上毋免行就自然會行進前喔！
摸奶巷是一條真隘的巷仔路，古早對向兩人欲相閃身過路，要隨人倚壁，面對面，肉對肉，密密密才會當過
去，逐個嘛趣味，綴導遊往回行行試看，有影喔！
(頂仔是摸奶巷)
百年老店的名產有：鄭玉珍餅舖(在瑤林古蹟保存區)、玉珍齋餅舖(在中山路上)等等；
其他古蹟有：半邊井、石敢當、九曲巷、甕窗、銃櫃、十宜樓、興安宮、龍山寺、文祠、城隍廟、三山國王
廟、金門館、勒建天后宮(新祖宮)、傳統小食市場等等‧亦有辜家本茨改設的鹿港民俗博物館‧1工實在看
未完啦！
(頂仔是觀光三輪車)
老大人、無想欲行路的遊客，街仔底有真濟固定的三輪車招呼站，會當坐在三輪車上，由司機兼解說員，陪
伴遊客徙街仔路，瀏覽逐位古蹟，嘛是有特色‧雖然，三輪車是40~50年前台灣的市內主要交通工具，不過
，到即時陣，全台灣就是賰鹿港和高雄市的旗後有觀光三輪車爾爾‧坐在三輪車上是有懷念的滋味‧
螺仔殼廟是另外一種手工藝術創造，內內外外，頂頂下下，大大細細，攏完全是用手工，將螺仔殼1粒1粒黏
去壁上、茨頂、花園造警等等；台灣似面環海，逐種海螺仔真濟，會當將螺仔殼按呢利用，尤其是全台灣唯
一的螺仔殼廟，嘛是無簡單啦！
(頂仔是螺仔殼廟)
海中漁場：聽導遊講欲去海中漁場食中晝，逐個攏真歡喜，因為去國外旅遊時，在海中央用餐的感受真好，
澳洲、泰國、馬來西亞、菲律賓等，連去澎湖嘛有喔！天開始落雨，來到海岸邊，啊！慘啦！海水退潮走出
來的路真隘、真細條，大型遊覽車根本無法度行，只好換鐵牛仔車，不過，要另外開車錢，逐個聽到真未爽
，亦是忍著，鐵牛仔車有超載的款，為著省時間，嘛是忍著，沿途濕地、海景是嫷，只是在企鐵牛仔車頂有
(頂仔是鐵牛仔車)
稍可仔心驚驚，總是行到位囉！餐廳氣氛、景緻攏算好，只是來到海中漁場，顛倒是食陸上的料理，實在予
人真意外，主委和幹部擋未diau啦！遊覽車小姐歸腹火，大聲替逐個出聲爭一口氣‧唉！一個經驗啦！開錢
消災，會當在漲潮前，全體安全返去遊覽車內上要緊，總是要平平安安上重要啦！相信即款海中漁場的做法
，一定無法度久長來繼續經營啦！台灣欲拼觀光、拼經濟，海中漁場的想法是真好，會使欣賞海景、海天一
色、看海水起落、坐竹排仔、遠眺漁火、淺灘摸螺仔、親子戲水、戲砂雕、做生態觀察、食海鮮、飲咖啡等
等，是生態教學、休閒度假的好方式，如果好好為遊客設想來經營，應該會當吸引真濟人來；不過，即款歹
樣食人夠夠的業者一定要整頓啦！
(頂仔是海中漁場餐廳)
全站熱搜
留言列表
