(頂仔是阿姆斯特丹街景運河)
台語文旅遊~~~~~西歐遊記(1)~荷蘭~~~~~遊子
歐洲是一個人文歷史真久，藝術文化膨湃，科技發達先進，經濟發展真好的所在；想講坐長時間的飛行機佚佗需要好體力，所以，和牽手
2人殘殘做伙行，參加荷德比法10的行程；先遊覽西歐，以後有機會才復去北歐東歐中歐南歐‧由台灣桃園(Taoyuan)國際機場到泰國曼
谷(Bangkok)國際機場要3點外鐘，歇睏2點鐘後，又飛行12點鐘才到荷蘭阿姆思特丹(Amsterdam)國際機場‧飛機內空間細，有影會悿
喔！西歐時間慢台灣6點鐘，時差的問題無去美國赫尼阿嚴重‧
(頂仔是阿姆斯特丹風車村)
荷蘭(Netherlands)的土地是台灣的1.1倍，全國土地平均比海面低4公尺，所以無懸山，沿路看去攏是平洋，阿姆思特丹市內運河真濟
，有歐洲小威尼斯的稱呼，郊外農業用途的圳溝非常普遍，人口有1400萬，感覺無像台灣赫尼阿窄，是16世紀的海上強權國家之一；統領
過台灣16年，所以，是和日本共款，保留著上濟的台灣歷史資料，不過在400年前是攏以教會羅馬字來記載‧心內想講台灣抑是予荷蘭管復
卡久的時間，毋知台灣的歷史會變成什麼款？可能像今仔日的荷蘭？嘛可能予荷蘭人擠到焦乾去，復卡慘喔！荷蘭是生理人來治國，所以逐
項事誌一定ghau計較，要求有效率，平時朋友做伙聚餐活動，咱定定講著：Go Deuch!就是荷蘭式隨人出隨人的，嘛是各一的意思‧阿姆
思特丹國際機場和德國的法蘭克福(Frankford)國際機場是全歐洲上鬧熱又上有效率的機場‧
(頂仔是荷蘭木屐)
在阿姆思特丹參觀風車群、製做柴屐工廠、製做奶酪工廠、鑽石加工廠、紅燈區、皇宮前的達姆廣場(Dam Square)和坐玻璃船徙運河看
市區風景；坐玻璃船遊覽運河，看到港口貨櫃量的出入，在世界是排頭仔名的，沿途運河邊的茨，懸懸低低各式各樣，多采多姿真有特色
，嘛攏維持著真好、真正媠，親像身在畫中的感覺，享受到恬靜悠閒無共的氣氛‧
(頂仔是阿姆斯特丹運河玻璃船)
參觀風車群時，知影現此時全荷蘭猶有900外座大細無共造型和用途的風車，有用來發電、送水、做農穡等等，其實咱台灣的水車嘛有共
款的功能喔！在台北縣三芝每年有辦水車節活動，值得咱去參觀遊覽；荷蘭真注重大自然環境的維護，所以發展真濟綠色能源，除了用風
車來發電、猶有即馬上熱門的太陽能板發電、傳統的水力發電、新開發出植物轉變做能源等等；空氣、運河水的污染防治，攏做著非常好
，衫仔領、鼻空攏﹝勿會﹞烏，糞圾分類20外年前就開始推行囉！這攏是咱愛學的所在‧
(頂仔是阿姆斯特丹奶酪工廠)
在製做柴屐工廠時，知影機器的效率，原本用人工是3點鐘才會當做好1雙柴屐，現場用機器表演，5分鐘就會當做好1雙柴屐，效率實在
差有夠濟啦！莫怪機器的效率在歐洲引起工業革命，對全世界的進步造成真大的影響‧看到製做奶酪工廠，瞭解位在高緯度地區，需要補
充高熱量的食物來維持身體的運作，所以，愛食奶酪起司(Cheese)的人，發育卡好喔！不過，長期愛食奶酪起司的飲食習慣，身體會發
出一種特別的味，這嘛是西洋人愛用芳水的原因之一啦！高緯度關係，即馬暗時8點外，日頭才準備欲落山耶‧
(頂仔是荷蘭木屐製作展示)
在紅燈區看到人類的古早行業，孔子公有講：食色性也‧兩爿河邊店面的櫥窗內，坐著真人予人挑揀，嘛參有一寡仔情趣用品店，聽講要
過晝以後才起市，愈暗愈鬧熱，踮遮予人看出人性的貪婪和人性尊嚴的懸低差別，這和社會經濟的進步親像無關係啊！和世界人種亦是宗
教信仰嘛無關係‧
荷蘭的花卉經營真出色，鬱金香(Tulip)名聲透全世界，全國就是1個芳花的國度，由花蕊來賺真濟錢；這方面嘛是台灣學習的方向，台
灣的草仔花類嘛漸漸在世界市場出頭天喔！
(頂仔是人造康乃馨)
留言列表
