(頂仔是由下向頂看的Effil鐵塔)
台語文~~~~~西歐遊記(6)~法國凡爾賽宮~~~~~遊子
今仔日是自由活動，每人需要另外交90歐元，才准綴領隊出來徙，抑無就隨人行隨人的路；
頭仔先去拿破崙紀念館參觀，續落到艾菲爾(Effil)鐵塔區域參觀，已經超過百外年囉！不
過，每過幾年攏有定期維修，抽換部份材質，予鐵塔的材質綴著世界的進步，才會當保持久
久長長予人繼續來參觀遊覽，由下面向頂仔看去，是另外一種感受，有1爿是行樓梯去鐵塔
頂，另外2爿是有流籠(升降電梯)載遊客去鐵塔頂，分做3層的瞭望區，懸度無共門票價數嘛
無共，下仔排隊的人真濟，可能需要40分鐘才輪會到，時間的關係，阮攏放棄去鐵塔頂參觀
遊覽的機會，咱台北101是全世界目前上懸的摩天大樓，返來台灣坐台北101的流籠，應該是
共款感受啦！逐國景緻無共，咱台北嘛無輸人啊！
(頂仔是香榭大道看凱旋門）
來到巴黎除了看風景觀光看show以外，採購世界名牌的物件，嘛是行程內真重要的一部份，
昨昏欲暗時，歸團先去拉法葉(Lafayette;嘛有人翻做老佛爺)百貨公司，時間無濟，40分
鐘爾爾，時間當然無夠，所以，今仔日利用食中晝時間，有3點鐘足足，有人無顧腹肚，稱
採食食著就趕去採購啦！拉法葉百貨公司共有3棟大樓，女裝館、男裝館、美食天地館，其
中1棟是世界名牌集中的所在，想會到的攏看會到，像：LV(LouisVuitton)、Sisley、Fendi、
Boulevard、Haussmann、Channel、La Colline、Long Champ、Christian Dior、
Mont Blanc、Coach、E.Arden、Avon、L'Osstanne、L'Oreal、Burberry、Gucci
、Calvin Klein、Clinique、Lancome、Prada、Herme's、Gucci、Estee Lauder、
Paul Smithl、Bally、Solaris、Diese、Nautica、Hugo Boss等等，我是外行的，
(頂仔是Lafayette百貨公司)
無法度念透透啦！因為會當退稅11~12%，聽內行的人講比在台灣的價數差3成以上，看無共
的團逐個攏買著真歡喜，大包細包，昨昏買無夠，今仔日緊買來輳；在退稅服務台有專櫃專
人服務，有日語、韓語、華語分開做台灣和中國等等，表示前仔幾個國家的團體，採購真強‧
皮包、皮鞋、皮帶、化妝品、保養品、烏目鏡、手錶、手套、領帶、流行服裝等等，攏付歐元
現金亦是刷卡，看每1人差不多攏帶2~4張卡喔！實在驚人啊！有寡仔商品又是限額銷售，無
一定講有錢就一定買有，生理實在做著真苛頭‧
(頂仔是凡爾賽宮大門)
(頂仔是路易14的畫像)
過晝來到離巴黎20外公里遠的凡爾賽宮(Versailles)，是法國路易王朝(13,14,15,16.)時
代的皇宮，在1624年路易13(1601~1643)先起1座守獵館，後來起1個小宮殿；經過路易14,
15的擴建，完成到即陣看到的規模範圍‧路易14在位上久(1638~1715)，坐位40年，自認為
像日頭共款普照大地，稱為太陽王，宮內處處出現太陽王的標誌；路易15(1710~1774)是生
在宮內嘛死在宮內的皇帝，路易16(1754~1793)是路易王朝上尾任皇帝，在1783年簽署關於
美國獨立的凡爾賽條約，不過，遇到法國的大革命，路易16和瑪莉皇后前後上協和廣場的斷頭
台，結束了法國路易王朝的傳續；法國的大革命，嘛引起全世界的社會變動，進入到後來的民
主選舉制度的民主政治‧
(頂仔是凡爾賽宮部份外觀)
(頂仔是凡爾賽宮的鏡廳)
凡爾賽宮內的寶物大部份已經徙去羅浮宮，賰的是皇室人員的日常傢俱用品等等，和皇宮本身
的建築物、天然水晶藝術品、黃金打造藝術品、鏡屋、外頭的人工運河、造景庭園、大門入口
的廣場等等，不過，已經真有看頭，建築物華麗宏偉，會當想到迄時王朝的生活有若奢華，造
成百姓生活艱苦，引起民怨，上尾才發生大革命，歷史實在就是一面鏡啊！凡爾賽宮的華麗宏
偉，可能連中國北京的紫禁城猶綴未到喔！來這參觀遊覽完，親像上完法國路易王朝的歷史課
，嘛是真特別的機會啦！
(頂仔是拿破崙的加冕典禮)
(頂仔是凡爾賽宮外頭庭園)
留言列表
