jimmycmlin的部落格

新聞辭典~~~~~三聚氰胺~~~~~遊子 2008.09.26.
最近由中國放毒欲害台灣人個佮全世界人的毒物就是三聚氰胺，伊到底是什麼驚人的物件呢？
三聚氰胺英語叫做：Melamine，化學式是：C3H6N6，俗稱：佇華語是叫做：密胺、氰尿醯、胺三聚醯，胺尚通用的名是卵白精；台語叫做：罵哪敏‧
三聚氰是胺1種白色單斜結晶體、無味、稍可仔溶入水的有機化學物，有毒性，所以自德國人發現後，攏干哪做化工原料，用佇化工產品爾爾，絕對無參入任何食品抑是食品添加物內底‧
是按怎，烏心廠商會將”罵哪敏”加入奶粉等食品內底？
因為奶粉的主要成份是卵白質(Protein)，奶粉的好bai2分級就是看卵白質含量的濟少，需要經過卵白質含量的檢測結果來判定‧
德國人真gau5，發現到三聚氰胺，中國人烏心奸巧，將伊加入奶粉內底‧因為一般卵白質含氮(N)的量差不多是總量的16%爾爾，三聚氰胺看伊的化學式是：C3H6N6，含氮(N)的量達到差不多是總量的66%懸，所以，將少量的三聚氰胺加入奶粉內底，予奶粉內卵白質含量的檢測結果變成較懸的假象，佇市場價數較好，予消費者誤認為俗閣大碗，其實是食了害人真嚴重的烏心物啦！
為什麼食到三聚氰胺會引起腰子結石？
因為三聚氰胺干哪稍可仔溶入水，所以，食入體內，胃腸無法度吸收，轉入去腰子時，腰子內有真濟大細的管路，三聚氰會胺沉佇大細的管路，日久月長，三聚氰胺的結晶體變成愈來愈大粒石仔，這就是腰子結石啦！石仔塞著大細管路的流通功能，嚴格時引起腰子失去功能，腰子衰竭，後半世人就需要靠洗腰子來過日子囉！細漢囡仔、嬰仔因為發育猶未完全，腰子內大細的管路猶真細條，閣較會引起腰子結石的情形‧
佇1983年，美國以動物做實驗的研究報告講：長期食入三聚氰胺是會致癌喔！尤其佇膀胱、腰子、尿道等部位的致癌機會尚懸‧醫生佮專家嘛攏認為三聚氰胺是有毒的化工原料，無應該參佇食品內，無應該出現佇咱人亦是動物的體內‧
無細膩食到有參三聚氰(月安)的物件欲按怎處理較好？
尚好的辦法就是盡量加飲(lim)水，平均每2點半鐘至4點鐘會使排出腰子內一半的量，只要補充的水份有夠額，9成佇1工內會排出體外，差不多2工後攏排出啦！1工補充的水份尚少需要2000cc以上，就會當避免腰子結石的出現‧