jimmycmlin的部落格

新聞辭典~~~~~粗梨幼梨佮高接梨~~~~~遊子 2008.09.21.
中秋過了正是梨子當好食的時陣，市場內看到的種類嘛真濟，有咱台灣
本土出產的，有國外進口的；有蜜梨、秋水梨、豐水梨、新興梨、新世
紀梨、鳥梨子等等，種類雖然真濟，其實就是咱古早所講的粗梨子，經
過高接技術的改良變成幼梨子‧按呢講，什麼是粗梨、幼梨佮高接梨？
粗梨就是咱台灣上早期的梨子，因為佇亞熱帶的關係，以酸甜仔、酸甜
仔的平地橫山梨為主，果子仔皮色較深，果子仔肉質清脆，食入喙內感
覺較粗絲，這就是一般所講的粗梨子‧
幼梨子是屬於溫帶品種，果子仔皮有的較薄，果子仔肉質清脆，食入喙
內感覺較幼綿綿，甜度亦較懸，水份較濟‧所以，較受人歡迎愛食‧
高接梨並毋是梨子品種的名，高接是一種技術喔！因為咱台灣屬於亞熱
帶的關係，寒天時無夠冷，除了有部份海拔較懸的高山地區以外，無法
度直接栽培出甜度較懸佮水份較濟的溫帶品種幼梨子；毋過，咱台灣
的農民真精會曉變巧，想出將海拔較懸地區的幼梨子花芽亦是進口國外
溫帶品種的幼梨子花芽，接穗佇平地橫山梨子樹枝頂，予生長佇較燒熱
所在的橫山梨子樹，真想未到會使結出溫帶品種的幼梨子‧無論任何品
種，只要是用即種高接技術種出來的梨子，攏總叫做高接梨啦！目前市
面上所看到的除了鳥梨子以外，差不多已經攏是高接梨子啦！