jimmycmlin的部落格

台語文~~~~~北海道5+1工遊覽(4)~~~~~遊子
天漸漸暗囉！又佮鼻到溫泉味，車來到北海道4大有名溫泉的定山溪(jyouzankei)，下暗就
蹛入來定山溪展望大飯店(View hotel)，zit落車聽到服務人員喝華語，原來zit間飯店有和
中國的旅館學校教學合作，中國的學生囡仔派來見習服務，攏是少年囡仔，查埔查某攏有，
看起來訓練甲真頂真，攏真好禮，對人客的應對互人感覺滿意啦！前幾暗是西洋式房間，下
暗無共款的，是大間的tatami眠床，有和式桌仔椅，心適仔心適！穿好浴衫(yukada)，歸
個氣氛就出來啦！溫泉池佇地下1樓和第2樓，另外佇第16樓，露天溫泉池佇16樓仔尾頂，
阮想講溫泉浸這呢阿久，猶毋bhat佇赫呢阿懸的所在，zit擺就來試看有什麼無共的感受？
哇！哩！2面是大塊玻璃，看出到真遠，附近的景緻攏看現現，不過，暗時暗暗，干哪看有
看到天頂的星光和地面細葩的燈仔伙，感覺是無共啦！上懸的露天溫泉池，照時段輪流互
查埔、查某分開去使用，總是﹝勿會﹞用哩參做伙啊！zit擺的溫泉有影浸甲真歡喜、真爽
快啦！
看電視台的氣象報告，知影有1個14號風颱可能會走向台灣，毋知會影響到倒轉去的行程
喔？其實佇北海道zit禮拜的天氣攏真好，日時27-29度，日頭落山後差不多是18-20度，
zah來長手綩的衫攏真少穿到‧啊！bhai想赫濟，踮zia就歡歡喜喜來sng才對‧
第4工囉！一早就來到有名的小樽，小樽早期是札幌(Sapporo)的外港，歐美國家的人真早
就來zia出入做生理，所以，市區的外國建築物真濟，嘛攏保存甲真好，小樽運河就是互細
台船仔將貨物由大船轉載入來市區，運河邊起真濟倉庫，後來交通路線和工具改變，即馬，
zia的倉庫攏改做古蹟、商店、餐館和紀念品店等等，吸引觀光客來tit-tor，運河邊和另外
2條街仔路，攏整理甲真清氣有特色，照講踅規工嘛無夠，阮時間無濟，2點鐘互阮去攝相
佮踅街；導遊先cua阮去1間咖啡館，bhue lim咖啡、茶米茶由在你選，lim完隨人的杯仔
就會當提轉去做紀念，he磁仔杯看到媠媠仔；續落就自由行動啦！有看到1座燒水氣的企鐘
，外型和加拿大溫哥華街仔路頂的一模一樣，聽講是完全照he個樣做出來的，嘛是過一定時
間就噴燒水氣，佮有bi-bi叫的聲音喔！其他有逐種的音樂盒仔，做到真精彩佮幼氣；硝子館
真濟，其實就是咱講的玻璃藝術品啦！一般照含鉛量的濟少，分做：普通玻璃、強化玻璃、
琉璃、水晶等等，由倒爿到正爿，含鉛量愈來愈濟，加熱時，溫度嘛需要愈來愈懸，作品就
愈艱苦做成‧親像世界上出名的水晶藝術品是奧地利(Austria)的Swarovski；咱台灣的琉園
和琉璃工房的琉璃藝術品嘛佇世界漸漸拍出名聲喔！上濟的店就是硝子館，嘛有教人DIY，家
己完成作品提轉去做紀念；其他專門賣葡萄酒、巧克力、本地海產伴手、等路、逐項手工紀念
品等等‧嘛搁看到果子仔店，哇！比拳頭母搁卡大的水蜜桃，1粒才200圓爾爾，即馬是in的
水蜜桃出產期，前幾暗佇店仔有買到280-380圓的水蜜桃，阮2人每晚攏有食著，zia 200圓
的看到媠佮大粒，隨買幾粒仔下暗通享受，真正甜佮有水份，入喙就滿芳味，幾年前開始禁止
zah果子入關，只好踮zia加食一寡仔，稍享受著‧
續落去，今仔日的中晝頓嘛是即擺行程的特色之一喔！拄仔有1位踅甲﹝勿會﹞記得上車時間
，互全車的人等40分鐘，來到餐廳有卡晚，其他台灣團嘛有3-4團，真鬧熱耶！阮是每4的人
1組，坐好就開始出菜，每人1份小火鍋、1份烘的鯖仔魚，佮來2人1大盤大隻蜘蛛蟹，食完
隨時搁送新的出來，前幾工雖然逐工有3種毛蟹，但是，無像安呢歸隻出來，搁無限量喔！