台語文~~~~~北海道5+1工遊覽(3)~~~~~遊子
續落又搁坐4點鐘的車才到登別(Noboribetsu)的溫泉旅館~~馬可波羅(Mahoroba)，實在
有夠大間，大門邊寫的歡迎看枋，看起來嘛是滿員喔！附近地區有像北投的溫泉飯店區‧晚
頓共款是赫尼阿滂湃，3種大毛蟹共款由在你食‧佇溫泉旅館内，會當看到穿日本式的浴衫
(yukada)來餐廳食飯，佇旅館内的任何所在，穿日本式的浴衫攏無要緊，這嘛是特色啦！
伊的溫泉間有2位，地下室1樓佮2樓，溫泉池的種類真濟款，有：硫磺泉、鹽水泉、鐵礦泉
、碳酸泉等等，地下室2樓有露天溫泉池，因為攏是無穿衫的裸體溫泉，所以，查埔查某分
開浸，時間無限啦！逐種溫泉池攏浸浸著，歸身驅就﹝勿會﹞悿啦！真讚喔！聽講寒天時去
浸露天溫泉池，會當看到外頭的白雪，身驅浸佇溫泉池內，手提麥仔酒，嘛是另外1種無共
滋味的享受！
行程進入第3工囉！早起先去無若遠的登別地獄谷行行，歸個山區攏佇歕煙，空氣中嘛攏有
硫磺味，和咱陽明山的小油坑、馬槽抑是金山的長春谷等，真共款啦！不過，in的步道安全
設施做著有卡好，對風景區的維護嘛卡周全，卡無人為的破壞，其中有1個溫泉池，溫度有
60外度懸，每15分鐘左右就會吐大氣一擺，池內的水ciang-ciang滾，水花歕真懸，企佇
邊仔稍可仔會驚惶喔！咱台南關子嶺的水火同源、屏東萬丹歕塗膏的火山﹝華語講泥火山﹞
等，台灣的類似景緻實在是無輸in啦！只是咱卡﹝勿會﹞曉去好好仔開發做觀光資源，是咱
愛用腦筋的所在‧
續落來坐流籠去熊的牧場(Kuma)，聽少年的講：注意！熊出沒‧的貼紙和逐種用品，佇台
灣是真有名佮真搶市喔！熊出沒的地區就是指北海道啦！有可能佇山區路邊行的時，就會拄
到熊喔！he嘛是真危險的代誌，無細膩bhue用哩！流籠比咱烏來的搁卡長，到頂頭，有3區
飼大細隻熊的園區，遊客會當開100圓買細粒麵粉做的飼料，踮邊仔kian過互in食，in嘛攏
有隨隻的地盤，抑是食過區，就會相拍冤家喔！看in佇討食的表情嘛真趣味，每1隻攏無什共
款，有的會beh樓梯到懸懸的位，有的企好好，2隻前跤合做伙，親像佇拜託hiat互伊食；嘛
有企佇水窟仔抵，萬一kian無準，落佇水內會浮出水面，就共款食會到；另外有幾隻仔食傷
飽，倒著無想bhue振動，kian有準就kiok起來食，無就無愛啦！真正是貧憚仙啊！園區內有
1間熊的博物館，解說熊的生態活動佮相關的近親動物類，有真濟大細隻熊的標本，看到親
像活的共款，嘛有講到愛奴原住民和熊的關係歷史，感覺日本的保育工課做著﹝勿會﹞bhai
i啦！即方面咱台灣是拄仔起步，有起步做總是比無做卡好啦！園區內猶有幾間仔白老原住民
的草仔茨，內底有原住民老人用水木(mizuki)做材料，用手工1刀1刀刻出大細隻，無共造型
的貓頭鳥，貓頭鳥是北海道原住民的保護神，刻出來作品，每1隻攏有伊的特色‧
繼續去參觀尼克斯(Nixe)海洋公園(Noboribetsu marine park)，規模無大，海洋公園佇咱
台灣已經嘛幾仔位有，像墾丁海洋館就經營著真好；佇尼克森海洋公園上特別的節目是企鵝
遊行，觀眾企2爿，1陣國王企鵝有7隻，1步1步，搖著搖著向前行，真受到大人囡仔的歡迎‧
搁過就去參觀白老愛奴原住民園區，看in的傳統表演，即部份佇另外1篇“愛奴民族”的文章
寫過，無再重複啦！
續落經過支芴湖(Shikotsuko)，伊是日本第2清的湖，第1是本州東北的田澤湖(tawazako)，
10年前全家有去過，支芴湖是佇北海道寒天﹝勿會﹞結冰的湖，緯度上北的位，湖面真闊，可
惜時間無夠，無法度坐船遊覽，欣賞著支芴湖美麗的山水美色景緻‧
留言列表
