jimmycmlin的部落格

台語文~~~~~北海道5+1工遊覽(2)~~~~~遊子
第2工的早起頓，有日本傳統式：泔糜仔、鹹鰱魚、醬菜類、豆腐、海帶味sor湯，卡特別
的是納豆﹝Nattou)，是細粒黃豆仔去發酵做成，用箸去挾時會牽絲，聽講絲愈濟愈好，第
1擺食的人，攏會互怪怪的味嚇到，有人毋敢食，不過，日本人的長歲壽佇全世界有名，納
豆就是in的秘訣之一喔！納豆會生出一種納豆激素(Enzyme)，對咱身體的血路清潔真有幫
助，食會合的人就真愛食，這幾年來，踮咱台灣的日本式百貨公司的超級市場，攏已經看會
到啦！市面上嘛有做成雞毛管的健康食品佇販賣喔！後來每工的早起頓，攏有即路菜喔！嘛
真受到逐家的捧場、愛食‧另外是西洋式的：菜色和世界逐位的差不多，實在講菜色無什麼
變化，只是在地取材無共啦！北海道的鮮牛奶有影好lim，北海道鮮牛奶做的冰淇淋嘛真讚！
以前就食過，昨昏佇丹頂鶴公園就先食才講啦！早起頓嘛有喔！
食飽就出發去世界有名的薰衣草新故鄉~~富良野(Furano)，日本人去歐洲普羅斯旺實地研
究，提草薰衣(Lavender)的種，轉來日本試種，上頭先選4位無共溫度、懸度和緯度的地區
，上續尾，發現到佇北海道的富良野種出來品質上好，花媠、精油抽出的品質好，所以，將
富良野附近地區攏鼓勵種薰衣草，而且規劃做休閒活動產業區，不是干哪佇日本出名，名聲
嘛已經透全世界囉！來zia親身浸在其中，確實有影媠啦！in無講hau-siau‧去富田花園農
場、Flower land花田參觀，搁教阮做抱枕，材料準備好，布套、曝焦的薰衣草杯，棉仔花
，服務人員嘛會曉講台灣話，就知影有若濟台灣人來tit-tor啦！說明完隨人diy，做好的作
品就za轉去做紀念啦！感覺真趣味佮有意思‧
外頭花田的逐種花，7彩的花蕊，1zua1 zua搁1zua，湊出1區1區搁1區的花田，變成歸大
片的花田，親像大條彩巾，鋪佇山頭、山嶺、山pia佮山坑仔，空氣搁清氣，天頂青青青，互
人感覺非常清爽‧四界就是遊客or-lor的聲音佮攝相做紀念‧抑是bhue省時間徙卡闊，嘛有
牛車通坐，1人日本錢300圓，阮2的老的嘛去坐看mai，好sng啦！
啊~~!即聲慘啦！相機的快門(Shutter)故障啦！第1卷底片才攝到30幾張，今仔日才第2工
爾爾，攏總za5卷底片，嘛無法度用啦！又無za備用的相機，赫尼阿媠的景緻，無通做紀念
，實在無採工；好佳在，佇花田的細間仔賣店，看到簡易型的camera，1台有27張底片，
賣價日本錢1600圓，嘛是愛開落去，抑無，後擺來補攝搁卡貴，1擺就買2台先用才講，以
前攏毋bhat用過即款相機，毋知洗出來的效果安怎？佇zia算是莊跤所在，無法度買到新數
位相只好就先暫時用啦！漸漸攝著順手，到上尾仔工，總共用4台簡易型的camera喔！轉來
台灣一洗出來，嘛是媠啦！只是沿路攏毋敢隨便攝，簡易型的camera嘛算貴，有時就2人企
做伙，請別人替阮攝，卡省底片啦！講到簡易型的camera嘛一腹氣，因為，上尾工佇札幌
的地下街，看到大俗賣：2台1組才賣日本錢1000圓爾爾！唉！可能是都市競爭的關係，心
內毋甘嘛無法度啦！莊跤所在賣卡貴，佇台灣嘛是共款啦！
趕走相機故障的歹心情，來到zia就是愛放輕鬆，好好仔享受到好風景才對！2人的心就開始
搁快樂起來啦！後來去美瑛之丘，嘛是將山坡地變成多采多姿的花田，去拓真館參觀，是1
個日本專業攝影家，將4季無共景緻的美瑛之丘，攝出真媠的作品，發表佇世界性的雜誌，
將美瑛之丘的媠介紹互世界的人知，名聲拍有成功，觀光客才一陣搁一陣來，創造北海道經
濟的奇蹟！