jimmycmlin的部落格

台語文~~~~~北海道5+1工遊覽(1)~~~~~遊子
退休4冬外，本來想講逐年攏會當出國遊覽看看，不過，人算不如天算，毋知佇無閒
什麼？一擺lang zat久，差不多3年外囉！趁歇熱尾仔，學校拄開始上課，團費有減
少時，和牽手相招，想想著，結婚到今，嘛才頭一擺2人同齊出國，比起即馬的少年
人，結婚後就隨出國去蜜月旅行，有的結婚前就同齊出國遊覽，阮老翁某實在講是綴
﹝勿會﹞到陣啦！
坐長榮的包機，直飛北海道(Hokkaido)的川路(Kushiro)，有3200外公里遠，愛飛3
點外鐘久，佇長榮的機內，有影是有台灣味，放送有華語、台語佮英語，椅仔邊的音
樂選台，嘛有1台是台語歌曲，互咱感覺卡親切，空中小姐的服務嘛互人真會or-lo哩‧
想到張榮發先生的用心，嘛互台灣人真感心；不過，舊年為著佇中國投資生理的關係
，才發表一篇倚中國立場的文稿，就傷害到台灣人的心啦！連張榮發先生嘛擋中國政
府﹝勿會﹞diau，其他的人搁卡免講，這可能就是大多數去中國投資者的悲哀啊！
Kushiro的機場無講真大，飛in的國內線和國際線的包機，看in機場內所掛的歡迎字條
，以漢字、簡體漢字佮韓國的諺文，會當看出來zia tit-tor的觀光客，是台灣、中國
、香港和韓國人上濟‧咱台灣人聽講1年有24萬外人來北海道tit-tor喔！實在嘛真
驚人啊！
落飛機了後，第一站來到丹頂鶴自然公園‧丹頂鶴是一種生湠佇中國東北地區和俄羅
斯國境的渡鳥，目前大概只有1800外隻，寒天哪到，就飛向朝鮮半島和中國的長江口
仔；另外佇北海道地區嘛有1000外隻，寒天就飛向本州方面去避冬‧伊的頭殼頂有一
髻紅色圓圓的毛，又是1公1母做伴終身的1翁1某制，所以，互人認定是：長壽、吉祥
佮翁某美滿好吉兆的表示‧佇19世紀時，互人掠甲賰無幾隻，1924年佇Kushiro搁發
現幾仔陣，1935年日本政府指定為天然紀念物，1952年開始投食飼料互in卡好生存
活落去，1958年為著保護佮繁殖生湠，設立丹頂鶴自然公園，配合人工繁殖，野生的
數量由100隻一直增加，到2005年為止，自第1代掠到的野生鶴開始繁殖生湠，細隻
鶴1代1代生湠，嘛已經出世到第5代啦！這對丹頂鶴的保育宣傳佮教育，是真重要佮
成功的鼓勵作用‧
續落去Kushiro濕原國家公園參觀，佇咱台灣有聽到真濟濕地，大部份攏位佇河口佮
海域相交插的所在，像：淡水竹圍、關渡平洋、新豐海口、七股瀉湖、東港海埔---等
等，有真豐富的動、植物自然生態，濕原是面積比濕地搁卡闊的稱呼，企佇展望台看
過去，是有影有夠大啦，踮濕原國家公園就會當遊覽1工，因為時間無夠，30分鐘連
un豆油嘛無夠，攝一張仔相做紀念爾爾‧
為著減少隔工趕車的路程，續落就加趕一段路，坐3點外鐘的車，差不多是基隆駛到
嘉義去啦！到旅館已經暗朦朦，bhue倚8點才食暗頓‧是自助式的由在人食到飽，哇
！大隻蜘蛛蟹的跤、大支螯、毛蟹、真鮮的sashimi,nigiri,道牛切片﹝北海道飼的牛，
聽講無輸神戶牛抑是松阪牛喔！﹞、菜色有夠濟，逐家坐車嘛坐真久，稍可仔iau過頓
，菜色好看佮好食，逐家1盤搁1盤，食到飽、飽、飽！第1工的感覺，逐項攏算是
﹝勿會﹞嫌哩啦！