jimmycmlin的部落格

咱的台灣~~~~~桃仔園的故事~~~~~遊子
即馬的桃園，古早號做虎茅庄，佇清朝雍正年間，這所在原本是凱達格蘭族群的棲息
地，因為野草滿滿是，定定會割傷經過的過路人，親像虎佇傷人，所以，互人叫做虎
茅庄‧雍正年間，踮台灣北部設有淡水廳，徙來遮開墾的移民嘛愈來愈濟，漳州人藍
勇等上早cua人來開墾，一直到乾隆年間，廣東移民薛啟隆率眾來虎茅庄開墾，才算
是大規模開墾的開始‧後來的移民，踮遮種真濟桃仔樹，春天桃仔花開甲滿山坪，規
個虎茅庄攏是桃仔花林，佇乾隆12年間時，就將地名改叫做桃仔園，乾隆39年，官府
修台灣府志，已經就記載桃仔園庄；到清朝光緒14年(1888年)，官方重新丈量土地
時陣，調製魚鱗冊頂仔已經有看到桃園即詞的記載，後來就繼續沿用落去‧
薛啟隆開墾團的開墾區，由今仔日的龜山經過桃園透到八德，並設公館佮草店街佇即
馬的中山路hit帶仔，所以，公館頭、草店尾的地名留傳到今猶原佇叫；佇日本國統
治時，50年間，桃園地區佇產業、經濟和交通等等，逐方面攏有真大的發展‧上早，
桃仔園分別屬於台北縣、新竹縣、桃仔園廳、桃園廳的桃澗堡，明治31年(1898年)
，桃園變成桃園廳治的所在，桃園廳所管轄地區直轄：桃園(包括大樹林、小樹林、
大檜溪、小檜溪等)、龜崙口、南崁、埔仔、八塊厝等5區，範圍差不多是即馬的桃
園市、八德市、蘆竹鄉和龜山鄉的大部份；桃園佇hit當時就已經做為地方政治中心
，都市建設嘛一步一步漸漸開展‧佇大正9年，改變施行街庄制，搁收納水汴頭、大
竹圍、新興、新庄仔、福星、中興等庄地，改叫做新竹州桃園郡桃園街‧佇老一輩開
講的時，嘛猶會當定定聽到桃園仔街即個名詞‧1945年戰後，國民黨政府廢除日本國
的舊制，將街庄制改變做鄉鎮制，保甲改變做村里；桃園仔街屬於新竹廳桃園區，設
縣治踮遮；1946.年成立桃園鎮公所，管轄地區有：桃園、大樹林、大檜溪、小檜溪
、水汴頭、埔仔、中路、崁仔腳等8大區域，1950年實施地方自治，重劃出桃園、新
竹、苗栗3縣，桃園鎮人口數3萬外人，猶原是桃園縣治的所在‧桃仔園的都市繼續發
展擴大，工商發達，人口增加，佇1971年人口數破10萬人，升格為縣轄市，桃園市到
2005年將近40萬人口數，是全縣人口數上濟的現代都市‧嘛是全台灣地區，住民有繼
續佇成長增加的幾個仔好所在之一‧