jimmycmlin的部落格

台語文~~~~~北海道5+1工遊覽(5)~~~~~遊子
逐家食著真歡喜，毛蟹和長跤蟹比較卡費氣，全是食大隻蜘蛛蟹來享受，隔壁團的台灣客，
攏用欣羨的目神看阮佇享受特別餐，聽導遊講即頓值得4000圓喔！吩咐逐家毋通客氣，盡量
食，做你安怎享受，頭家攏﹝勿會﹞驚，只要毋是浪費討債食，佮非常歡迎喔！食上濟的記錄
會當做上讚的宣傳廣告資料啊！
食飽囉！就入道都城~~札幌(Sapporo)，札幌是北海道上大的都市，有180外萬人，是道政
府的所在市，市區的景觀和北海道其他所在無共，大樓濟、交通方便，有地下鐵、國營鐵路新
幹線、市內巴士、市內有鐵枝仔路的電車等等，和本州的都市差不多啦！市中心的大通公園，
長有1.5公里，闊有65公尺，比台北市的仁愛路、敦化南北路卡闊佮卡媠，每工透早NHK放送
新聞的背景景色，就是用大通公園的媠景緻‧花草、樹仔、歕水池、涼椅等等，是繁華鬧熱的
市區內，互人休閒恬恬的好所在，平時會安排農產品的展售彈擔仔位，北海道出產的農產品，
像：甜蕃麥、馬鈴薯、哈密瓜、水蜜桃、巨峰葡萄、大根(白菜頭) 等等；抑是魚類海鮮產品的
展售會‧in的攤仔位、公用便所、糞埽箱的規劃，歸個環境互人感覺真清氣‧春天賞櫻叫做花
見(hanami)，熱天是薰衣草(laverda) ，秋天是楓仔葉反紅叫紅葉，寒天歕水池嘛攏結冰，
大通公園就變成大型的冰雕藝術品的展示場，觀光客嘛是非常濟的季節喔！
大通公園的上頭仔，企著懸懸的鐵塔，he就是NHK的電視台放送塔，有147.2m懸，會當坐流
籠到90m懸的展望台參觀遊覽，門票700圓‧伊是全日本第5懸的高塔建築‧當然，現在全世
界第1懸的建築物是咱的“台北101”，這是咱的驕傲，真有面子啊！踮佇電視塔頂內底，會
當欣賞到札幌市的四箍輪轉景色，日頭起落、人車來往、暗時七彩的燈仔火佮廣告燈等等；佇
世界逐個大都市攏有懸塔建築做代表，日本的東京、大阪、福岡、神戶；美國的紐約、西雅圖
；法國的巴黎鐵塔是上早的懸塔，澳洲的墨爾本、雪梨，加拿大的多倫多，馬來西亞的吉隆坡
双塔，咱的高雄市嘛有”85懸塔”等等‧大通公園邊仔嘛有觀光馬車，互人坐著遊覽街景‧趣
味啦！札幌市內的時計台，起佇1878年的明治天皇時代，hit當時一般人真少有時鐘抑是手錶，
時計台就是為逐家來報時，有時鐘抑是手錶的人，會當定時來對正確時間‧舊道廳的建築物真
像咱的總統府抑是228公園內的博物館，差不多共時陣in日本人設計起的，舊道廳內做博物館，
介紹北海道的歷史過去佮未來的嚮望，資料cuan甲真濟；另1間是樺太關係資料館，主要展示
南樺太自古以來和北海道的關係，樺太島就是即馬叫做庫頁島(Sakhalin)，自日俄戰爭俄國戰
敗後，差不多有80萬日本人佇hia開墾生活，但是到1940年2次大戰尾期，賰一半左右的日本
人繼續留落，日本戰敗了後，蘇聯佔領歸個庫頁島，1946年起，戰敗的日本人就互蘇聯趕轉去
北海道啦！過著艱苦的日子，嘛猶有少數的日本人繼續留佇南樺太；戰後經過in政府和民間團
體的努力拍拼，佇1965年辦理去薩哈林(Sakhalin)的掃墓活動，以後每年攏由政府出面規劃
掃墓活動，1998年北海道和薩哈林政府牽署“關于締結友好、經濟合作”的條約‧這個樺太關
係資料館就是bhue叫日本人毋通去放﹝勿會﹞記得北海道和薩哈林的歷史關係‧
暗頓是去居酒屋食看in日本式的配酒菜是什麼款，嘛是4的人1組來出菜，1組有10路菜色：野
菜沙拉、生魚片(sasimi) 、烘雞肉、炸雞塊、披薩(pizza) 、烘魚仔有35cm長喔！炸豆腐塊
、海菜湯、甜點心等等，隨人加1大杯愛lim的飲料‧食飯中，導遊講今仔日下埔16:00，台北
市宣佈停止上班啦！中正機場飛機可能停飛，明仔日愛加留1工的款！啊！毋知算是好抑是歹？