台語文~~~~~北海道5+1工遊覽(6/完)~~~~~遊子
本來上尾工的行程就半工爾爾，因為趕去帶廣(Obihiro)機場愛4點鐘久，即馬延1工，改由新千歲
(Chitose)機場起飛，早起導遊共款cua逐家去參觀tit-tor，中晝頓開始就隨人食家己啦~~自由
活動，行程的調整，公司退互團員每人2000圓；下暗的旅館錢本來是12000圓1間，明仔早的早
頓因為06:45開車，每人省1000圓，總共2000圓，變做1間10000圓‧導遊講完逐家無第2句話
，交錢就是，加sng1工，明仔早會當平平安安轉台灣卡要緊‧
有名的Sapporo Beer札幌麥仔酒，伊的舊廠房改做麥仔酒博物館，展示伊的開始生產的歷史，
派專家去全世界找尋上好的麥仔種做原料，伊的矸仔演變的歷史，看到廣告海報，親像無共時代
藝人、運動員、電影明星的懷念之遊；續落1人1杯麥仔酒招待，有5種口味通選，其實猶毋bhat
透早就lim麥仔酒，不過，大部份的人嘛攏試lim看口味怎樣？正經毋敢lim麥仔酒的，另外有果汁
抑是茶通選‧Sapporo Beer是好滋味，但是，咱台灣尚青的麥仔酒，無輸伊喔！
續落去北海道唯一的神宮~~北海道神宮，拄好是祭拜日，卡濟人佇唸經做法會，觀光客就恬恬
踮邊仔看，宗教信仰每個國家地區攏無共，總是參考比較，求平安的心意應該是共款啦！咱牽新
車頭1工，攏會佇車頭結紅彩，求平安吉利；日本人牽新車前，嘛先到神宮抑是神社要求“畫馬”
(Ema)，共款是祈求開車大吉保平安的意思‧神宮的保身符種類有夠濟，阮牽手嘛祈求3份轉去
互序細，我這老的就省起來啦！
倚中晝開始自由活動啦！阮就先去新札幌車站踅踅著，双爿賣場和百貨公司的建築物攏佮車站相
通，踅起來真方便，免曝日頭；日本自10幾年前，泡沫經濟破去後，食的物件的價數攏落落來啦！
市面上看到卡俗的商品差不多攏是中國做的，正港日本貨價數就貴啦！後來先轉去大通公園邊的
後樂園旅館稍歇著，自費的自由行，歇傷久算﹝勿會﹞合，緊搁出來踅街啦！先去NHK電視塔參
觀，欣賞到日頭落山的景色和暗時彩色廣告燈的美景，由懸頂看倒落，大通公園有影大佮媠啊！
暗頓就踮公園內的涼椅仔解決，逐工食好料大頓，即頓是水蜜桃大餐啦！風姨微微吹，涼啊！涼‧
水蜜桃既然﹝勿會﹞當提轉，就攏甲解決掉才輕鬆‧安呢嘛是1頓啦！
搁來就去踅地下街，即個所在真競爭喔！就是看到簡易相機2台1000圓以下爾爾，有影會槌心肝，
唉！無法度啦！需要開總是愛開啦！有看到大隻蜘蛛蟹，熟的鮮的攏有，照秤重算價數，由6000
圓~20000圓以上攏有，想講昨昏1人食1隻，上少嘛值6000圓，夠本啦！嘛有看到藥仔店，一般
價數比導遊cua去的所謂免稅店卡俗啦！不過，共款包裝的藥品，價數差規倍嘛是有，所以，買物
亦是愛稍比較卡妥當‧狸小路和高雄市的新崛江非常共款，拉麵町就是1條細條巷仔，全是賣拉麵
和關東煮(oden)、配酒菜的所在，想到以前去大阪出差，會社的朋友嘛bhat佇類似的店仔請lim燒
酒，一般的觀光客應該真少來即款所在，但是，拉麵町例外啦！觀光客是聽名聲來食‧
佇日本tit-tor猶有1項愛講，就是逐位的便所攏真清氣無臭味；旅館的便所，毋管是房間內抑是公
用的，攏有裝自動溫水沖洗尻川的設備，台灣嘛有看過，不過，無使用過，即擺每工用，感覺設計
甲真好喔！對個人衛生佮健康維護真有幫助‧莫怪人講：由便所的設備佮清氣的情形，會當看出1
個國家地區文明進步的程度‧
風颱過去啦！透早鬧鐘仔未叫就起床，準備去千歲機場轉台灣囉！可能傷久無出國，天公伯仔特別
互阮加sng1工，所以，題目才寫5+1工，帶著滿滿的2憶轉阮兜，毋是錢財的2億，是甜美的記憶
佮媠媠的回憶！等儉有夠錢銀，時間會拄好，才佮手牽手同齊來別位tit-tor遊覽！
留言列表
