台語文~~~~~七股鹽山感想~~~~~遊子
真早就聽講七股鹽山真好sng，即擺有機會親身來行看著‧哇！停車場內滿滿是
的車，大型遊覽車、逐位來的自用車，有影人氣真正旺‧
遠遠就看到親像金字塔的一座白色的山，山頭、山pia、山崁，攏是一點一點的
狗蟻佇徙轉動，後來，行倚一看，才看清楚是大人、囡仔、查埔、查某、老人、
嬰仔攏有，頂頭是日頭赤炎炎，下仔是逐家鬧熱滾滾，笑聲、吱吱叫的聲，輪流
聽﹝勿會﹞停，有影是真好sng啦！
另外一座鳥鼠色的鹽山，搁卡懸，踮佇上頂頭，四箍輪轉攏看甲遠遠遠，清清清，
白令絲激歸陣，鹽田像豆腐塊，四正四正，一格一格；一座金閃閃的玻璃金字塔，
cai佇遠遠的大路邊，聽講he是鹽的博物館，講著台灣鹽的歷史代‧
販賣店內，攏是台鹽公司，最近3-4年來開發出來的新產品，市場上真食市，有幾
項仔搁真搶市，互台鹽公司賺大錢‧邊仔出租的攤仔位，嘛管理甲清清氣氣，台南
地區的名產好食物，逐項有‧
台鹽公司原本是公家經營，逐年了錢，愛賣土地才有通發員工的月給‧自從改變做
民營公司制度，鄭寶清董事長接任以後，大大整頓，提高員工的工作士氣，開源節
流，一方面節省過去浪費的所在，互台鹽公司省著真濟開銷‧就親像經營之神王永
慶先生所講：做生理賺1箍時，無一定正經賺到1箍；省1箍的時，就正經賺到1箍啦
！另外一方面開發新產品，互原本看來普通普通的鹽，轉變做真濟合時代的新產品
，每工食的鹽就分做幾仔種，亦有洗浴用的、美容用的、醫療用的等等，由海底抽
出處理互咱lim的水、查某人用的面膜、化妝品等等‧互台鹽公司內的大大細細攏
認真拍拼，七股鹽山嘛由一個無人行踏的荒涼地，轉變做一個觀光熱門點‧這一切
的努力拍拼，互員工的年尾賞金達到每人12個月，破紀錄的賞金，無輸改做民營的
中鋼公司，嘛無輸科技業界的公司‧
所以，來到七股鹽山，嘛感受到一間企業的經營，按怎樣來改頭換面，由一間像日
頭將bhue落山的公司，用心變成像透早日頭bhue beh懸的公司，有影是事在人為
啦！
留言列表
