jimmycmlin的部落格

台語文~~~~~四草生態之旅~~~~~遊子
難得的好天氣，季節bhue入到補冬囉，日時猶原超過30度，逐家坐佇遊艇頂，
聽著解說員漸漸講著台南四草潟湖的景觀生態佮歷史，微微仔的風，一陣一陣
由台灣烏水溝~~台灣海峽hit爿吹過來，互船頂的人﹝勿會﹞感覺潝熱，水面
一波一波的白湧，無講真大，看來是坐船遊覽的好時陣‧
沿路的水邊，真旺的水筆仔、海茄苳、五梨跤、欖李等等，這四種攏叫做紅樹
林，沿
路做成一條綠色的水道，樹仔跤的濕地，不時會當看到招潮蟹、夜目大眼蟹、
和尚蟹、真歹的元軸蟹、彈塗魚等等；樹仔頂kia著真濟大白鷺、細白鷺和叫
﹝勿會﹞出名的渡鳥，水面沙洲嘛激歸陣的渡鳥，尖尖的喙管，潛入水底佇討
食，頭殼頂嘛不時有大細的渡鳥，飛過來飛過去，互平靜的水域，變成真鬧熱
，逐家一面聽，一面看，攏感覺非常趣味，真稀罕啊！可惜無看到烏面琵鷺，
因為in攏佇bhue暗時，才歇佇近海的沙洲頂，愛去七股的海邊仔才看會到‧
遊艇慢慢仔徙過水上森林，看到水面上插真濟長長的竹篙仔，解說員講he是囥
定置網用的，魚網仔固定佇水底，定期過去巡，順續將走入去魚網仔內的魚蟹
掠出來；繼續向前行，看到一區一區的蚵仔棚，解說員講飼佇潟湖的蚵仔，愛
10-12個月才會當收成，抑是飼佇外頭近海的蚵仔，6個月就肥搁大好收成，不
過，熱天時有風颱期，無法度飼養，一般愛白露過才開始飼養，一直到過轉年
的熱天期‧看到蚵仔棚，就想到舊年熱天去澎湖tit tor時，現烘的鮮蚵仔，
10的人1爐，由在你食到飽，撥開蚵仔殼，大粒鮮蚵有夠讚啦！即馬想著，喙
瀾水就強bhue流出來，有影每人攏食甲喝毋敢啦！後來去東港的大鵬灣，平平
是現烘鮮蚵仔，品質和氣氛攏對﹝勿會﹞到，差有夠濟，所以，推廣觀光遊覽
活動，真正需要用心設計和規劃，才會互人or lor和懷念、推荐啊！
遊艇愈來愈倚四草跨海大橋，解說員講一般無申請許可證的任何船隻，攏﹝勿會﹞
當駛過橋，抑無就變成偷渡客啦！四草跨海大橋的hit爿，就是古早人講的台灣
烏水溝啦！海湧大搁猛，唐山公毋驚死，渡過台灣烏水溝，來台灣賺食‧in嘛攏
有可能是咱的祖先喔！另外，佇倚大橋的海域，嘛看到幾仔排的竹篙仔，解說員
講he是準備卡過bhue ho鰻仔栽用的‧
遊艇行到一所在，看到遠遠的一棟瞭望台，解說員講he就是荷蘭人起的安平古堡
啦！重新整修，屬一級古蹟啦！嘛看到岸邊有四草砲台的就建築物；以前逐家攏
講：一府、二鹿、三艋舺‧所以，咱全台灣的古蹟，台南上濟，佔有60%喔！台南
市內的古蹟滿滿是啦！
即擺，坐遊艇的~~四草生態之旅，實在是﹝勿會﹞bhai，有價值啦！會當看到咱
台灣的嫷所在，進一步了解咱台灣的歷史，對大人和囡仔的教育攏真好‧