jimmycmlin的部落格

新聞辭典~~~~~廟公廟婆~~~~~遊子
媒體報導：因為寺廟信徒添油香的錢減少，廟公廟婆無法度來加薪---‧
廟公廟婆到底算是360行的什麼款頭路？
一般咱所叫的廟公、廟婆佇華語叫廟祝‧伊是受寺廟的信徒大會亦是寺
廟的管理委員會聘請，每工來維持寺廟內外大小項代誌的寺廟管理工課‧
算是神職人員的1類‧古早農業社會時，較有敬天謝神的觀念，擔任廟公
、廟婆的人差不多攏是義務職，無錢工課啦！毋過，變遷到工商社會了後
，逐項工課攏要有專業精神，要付出費用予辛苦做穡的人，所以改為有底
薪閣由添油香的錢來抽成，漸漸又改為每個月領固定薪水的制度‧
因為諸神每工天光就開始辦公，所以，每工透早天猶未光，廟公、廟婆就
要將寺廟的大門拍開，一般佇透早4~5點仔左右，續落來向諸神上香、敬
茶、敬四果、換鮮花等等，閣來整理寺廟內外的環境，保持清氣、優雅，
予來參拜的信徒感覺身心舒爽‧捌字的廟公、廟婆，嘛要負責解說信徒抽
籤的籤詩，一直到暗時9點關廟門後才會使收工歇睏，算起來每工做穡的
時間真長，達到16~17點鐘，尤其全年攏無歇睏，無輸7-11耶！抑是，無
心內的宗教信仰，無濟的薪水，無什麼保險福利，是無什麼人做的久長‧