jimmycmlin的部落格

新聞辭典~~~~~社會住宅~~~~~遊子 2010.11.08.
媒體報導：5都選舉欲到，茨價炒著過頭懸，引起百姓怨恨不滿，政府緊出來滅火，喝講欲起”小帝寶”為社會住宅，不過，政策雄狂，無配套措施，恐驚是選舉前喝喝著爾爾，選票騙過又閣無影無跡啦！
咱知影有”國民住宅”、”軍公教住宅”、”低收入住宅”、”平價住宅”、”豪宅”，按呢，什麼是”社會住宅”？
社會住宅英文是Social Housing，佇歐洲又叫做”社會出租住宅”[Social Rented Housing]；伊是強調”只租不賣”的精神，簡單講就是由政府揣適當的所在，起舒適合著蹛人的茨，推出”只租不賣”的方式，以比較市場較俗的租金亦是免費，出租予低收入的家庭亦是較特殊的弱勢家戶為對象‧
社會住宅是佇歐洲上早出現，到今亦已經有超過百年的歷史囉！是佇都市化發展過程中，因為住宅市場供需機能失調，造成低收入的家戶買未起1間仔通避風遮日的茨，續尾會引起社會怨妒佮不滿，進一步造成政治衝突，漸漸經過社會改革後，上尾仔由政府來做補救措施，採取由政府負責起茨，以提供予弱勢家戶解決蹛的困難問題，這就是叫做”社會住宅”‧
咱看國外的情形，佇荷蘭達到34%的社會住宅，香港有”公屋”的公營住宅政策，新加坡亦提供9成住宅予民眾，美國、日本、韓國等等的政策，嘛攏比咱台灣較好！咱台灣的社會住宅只有0.08%爾爾，實在可憐！無底比啊！過去的國民住宅品質差、風評無好，前車之鑑，毋通閣來1擺‧大家驚講只是”633”、”馬上好”！閣來騙的啦！