jimmycmlin的部落格

新聞辭典~~~~~放棄急救[DNR]~~~~~遊子 2010.11.13.
咱攏有機會佇病院的急診處亦是住院病房內，看到病人的親屬亦是家己的至親，因為醫療團隊心內有數，予醫生宣佈閣救起來的希望非常渺小，病人的至親家屬雖然毋甘，經過大家討論後，大部份亦是會接受現實，簽下拒絕急救同意書，希望予親人mai3閣繼續受折磨、受苦，會當有尊嚴來綴佛祖行，去上帝的所在‧
“拒絕急救”是什麼意義？
“拒絕急救”佇醫學臨床上叫做放棄急救[英文是：Do Not Resucitate;DNR]‧包括放棄對尾仔期的患者施行下仔的行為，包括：肺管切開來插喘氣的管[華語叫做氣切插管]、使用呼吸器、人工心肺復甦術、心臟電擊、升壓藥物等等‧
一般健康的人，在生的時就會使簽署拒絕急救同意書，亦是會當登錄在家己的健保卡內，一旦萬一拄到病危時，佇醫生盡全力搶救後，猶原無通有閣救起來的希望時，搶救的醫生就會使遵照個人所簽署的拒絕急救同意書，來撤除相關維持性命的醫療設備‧不過，抑是佇病危時才簽同意書，按呢，簽署進前已經施行的醫療措施就未當來撤除‧
簽署放棄急救同意書時，需要符合以下的規定：
應該由2位醫生診斷確實屬於末期病患，其中1位醫生應該有相關專科醫師的資格，應有意願人簽署的意願書，如果末期病患的意識昏迷，亦是無法度清楚表達意願時，伊的意願書改由上親近的親屬來代替簽署同意書‧但是未當佮末期病患在意識昏迷亦是佮佇無法度清楚表達意願時的意思相反‧
大家漸漸對生死觀念來改變，對進入末期的病患，會當選來接受安寧照護，予醫生宣佈閣救起來無望時，至親家屬就忍著悲痛簽下拒絕急救同意書，予末期的親人安心佮有尊嚴來離開咱。