咱的台灣~~~~~鴻福寺~~~~~遊子 2010.11.14.
媒體報導：桃園市鴻福寺改建完成，佇2010.11.13.啟用佮安座開光‧
鴻福寺佇桃園寺廟的發展歷史上，算是上古早起的寺廟，亦是名列桃園4大寺廟[鴻福寺、景福宮、西廟、關帝廟]的頭名‧
鴻福寺起在清朝乾隆16年[西元1751年]，到今已經有260外年啦！由早期先民先賢出錢出力，以塗角茨蓋稻草來完成，起頭叫做鴻福巖，不過，佇桃仔園的老輩攏叫伊為彿祖廟，算是桃仔園地區上早創建的廟寺‧
香火傳到乾隆52年[西元1787年]時，進行頭1擺整修，猶原保持塗角茨蓋稻草的原樣，因為塗角茨蓋稻草較無法度承受著風吹雨淋，後來佇清朝道光28年[西元1848年]，全部拆掉重新改建，以磚仔塊起出3合院式的新廟寺‧
寺內初期供奉媽祖林默娘神位、太始祖比干公木像神位、林姓始祖堅公神位、九牧公神位，所以，亦算屬林姓宗親的祖廟；傳到日本統治時陣[西元1932年]，增請奉祀觀世音菩薩、阿彌陀佛等等，所以，桃仔園的地方人士亦改叫做佛祖廟；依據桃園地誌所記載：鴻福巖名列桃園4大寺廟[鴻福巖、景福宮、西廟、關帝廟]之首，來到民國48年[西元1959年]，經過信徒大會全體通過，改名為鴻福寺，一直到今，攏是桃園地區上重要的信仰中心，建築物亦列為3級古蹟，不過，因為年久失修，原本建材無通揣，佇西元2006年，又經過信徒大會多數通過，閣1擺來全部拆掉重新改建，佇2010.11.13.啟用佮安座開光‧
新完成的佛寺建築物，宏偉莊嚴，美輪美奐，寺內主祀：阿彌陀佛、觀世音菩薩、大勢至菩薩，尊稱西方3聖；同祀：彌勒佛、地藏王菩薩、18羅漢、天上聖母等等‧雖然，失去做為3級古蹟的資格，是較可惜！信徒、香客希望這擺的重新改建，會當好好仔維護保惜，留傳永久，mai3閣拆除毀損，有1工閣爭回古蹟的資格，留傳萬代‧
全站熱搜
留言列表
