台語文~~~~~北越6工旅遊感(1)~~~~~遊子 2009.11.14.
每年計劃海外旅遊2擺，1擺長途1擺短途，上半年已經去過東歐10工，這擺就選較少工的囉！
牽手每禮拜頂真仔揣無共的行程來寬寬仔比較，想欲有特色，mai3佮過去相共，又想欲俗閣
大碗，上尾仔決定參加由領隊達人所tshua7的北越6工旅遊‧一路行落來，有影是趣味、難得
、回甘、珍貴有特色‧
SAPA沙霸LAO CAI老街是這擺較特殊的點，台灣團來遮猶少，阮這擺算是旅行社的第4團爾爾
‧由HA NOI河內到老街往回攏是坐暗時有睏舖的火車，4個人1間車廂，分双爿佮頂下層，總
共有15節車廂喔！食飽暗8點外開車，透早4點外天未光就到位，一下子時間就予阮倒轉去30
年前的台鐵，hit當時台北高雄嘛是有睏舖的暗車，予人省旅社錢；規暝ki-kok8 ki-kok8，
半路有車站歇睏時才無聲恬靜，毋過，起行後共款ki-kok8 ki-kok8啦！睏未去的人會使去
上頭前的餐車食物件、[口林]酒、[口林]飲料、開講、耍牌等等‧
由老街去沙霸只有36公里，毋過，海拔由85公尺[足百]去1650公尺懸，溫度是差欲規10度，
前暝聽講是12度的綿綿仔雨，真好運拄到出日頭天，大家歡喜甲有賰‧因為路面無真好，旅遊
團攏坐小型巴士(小巴)，沿路環山翻嶺，經過1山閣1山，到海拔800公尺懸以後，一片一片的
梯田美景進入每人的目睭底，無共的角度、日頭照、種的作物等等，展現出無共的景色，1區1
區，有大有細，有闊有狹，有懸有低，有青有黃；半途較嫷的所在，運匠大的好心停路邊幾仔
擺，予阮落車隨人提相機，翕甲歡喜滿意才上車繼續行‧這是自然的景緻，亦是大環境來造成
的，才予人感覺真特別珍貴，在地做穡人其實是真艱苦‧聽講台北市準備開大把錢來人工造梯
田的景色，實在是不答不七啦！有錢應該緊還健保局才是啊！
進入沙霸感覺是到歐洲的感覺，上先看到規排七彩的別莊企佇沙霸湖畔，水面有七彩別莊的倒
影，親像佇歐洲的小鎮共款；來遮的歐洲客非常濟，這佮法國人殖民統治越南百外年有關係，
法國人將越南的逐所在起法國式建築物、歐洲味的花園、湖區、山景等等，推展法國式飲食料
理，佇市區路邊攏有賣法國麵包的擔仔喔！法國人亦將越南原本用的漢字改變為完全羅馬字母
拼音系統，有5個聲調符號，拄仔看到越南文字，有熟似的感覺，因為佮咱台灣羅馬字母拼音系
統真親像，咱是有8個聲調符號，咱嘛保留用漢字，亦有漢羅併用的情形.
沙霸的街仔路嘛是親像歐洲的街仔路，外觀、內部設備、看板、窗子門邊的花草等等，滿叨位
攏是歐美人，2人1組自由行的遊客亦真濟，所以，旅遊服務(Travel Service)的店面袂少，
重型烏都[禾黑](Autobike)出租嘛有；亞洲遊客有影無濟，阮的領隊達人Terry San嘛是頭
一擺來，看伊真認真服務以外，嘛真拼勢佇翕相做資料‧
食飽暗，外頭街仔路猶原鬧熱滾滾，餐廳[口林]麥子酒、飲料、開講的遊客繼續續攤；教堂大
廣場四箍輪轉攏是夜市仔攤子位，在地手工藝品、食的、穿的、耍的，亦有真濟山賊版的衫仔
褲，價數是正牌的2割左右爾爾，看隨人[台刂]價的功夫啦！問價數時攏會問你Dollar(美金)
?Don(越南盾)?比較起來越南人較愛收美金‧現此時1箍美金換18000越南盾，1箍新台幣換500
越南盾，感覺咱新台幣真大、真好用，毋過，咱絕對毋通袂記得，終戰後、咱台幣4萬箍予政府
切換做1箍去的慘痛經驗啊！
沙霸地區聽講1工內就會當感受到春、夏、秋、冬的氣候，阮是無遇到寒天的氣氛，只有春、夏
、秋的感覺；暗時坐踮房間外頭的陽台，微微仔涼風陣陣吹來面，夯頭欣賞著烏-mih-ma3天頂
的滿天星，有親像佇咱台灣清境農場的感覺，真正讚！即馬，欲看到滿天星，實在是無簡單啦！
透早6點天猶稍可仔光爾爾，無若遠的山腰浮著一大片雲海，四周圍恬靜、恬靜，空氣清新參有
淡薄仔青草味，巷子路有人揹著竹簍子趕早市，企佇陽台[扌亥]手練功，享受著恬靜健康的氣氛
，有影是休閒放輕鬆的好所在‧莫怪歐洲人真愛來遮‧
留言列表
