jimmycmlin的部落格

台語文~~~~~北越6工旅遊感(2)~~~~~遊子 2009.11.16.
越南總共有54個民族，比咱台灣閣較濟、閣較複雜，毋過，[人因]的族群好做伙，對少數民族
的文化傳統風俗攏有實在的保護，佇高山區照常有學校，予[人因]的囡仔會當接受著正常的教
育；佇SAPA沙霸地區、LaoCai老街省是以紅瑤族、白瑤族、烏瑤族、青瑤族、花瑤族、長褲
瑤族等為主，依據[人因]所穿衫仔褲的色緻無共款來區分，普遍無懸，無論查埔查某大部份攏
無超過150公分懸，又閣攏早婚，所以，10外歲仔就做老母，揹囡仔佇做穡頭；阮參觀過幾仔
位無共所在的莊頭部落，親像咱台灣50年前高山原住民的生活，物質生活雖然看起來無好，毋
過，看[人因]的表現攏真善良、樂天過日子；黃牛、水牛佇田裡滿滿是，豬、雞、鴨、鵝等等
，攏放佇外面飼，這就是咱所講的正土雞、土鴨甘毋是？因為歐美遊客濟，[人因]的囡仔自細
漢就會曉講英語，遊客落車隨有囡仔綴著身軀邊，喙講：buy me some money?buy me some
money?沿路自頭陪你行到尾仔，幾點鐘攏無要緊，毋過，導遊有交待：抑是無想欲買，保持不
理、不回應就好‧抑無，心一軟，其他的囡仔會規陣圍過來，予你無法度脫身喔！有時真正無想
欲買什麼物件，又想欲幫贊遮的囡仔，送糖仔餅、文具用品等等是會用哩！導遊亦閣交待：毋通
直接提錢予[人因]的囡仔，才袂予[人因]的囡仔造成免做就有錢通收的錯誤觀念‧如果有佮
[人因]做伙翕相時，才予[人因]小費就無要緊，小費一定愛用紙票，袂當用銀角仔喔！一般是予
伊5000盾亦是10000盾的銀票啦！

北河位佇老街市東爿110公里，是花瑤族的大本營，北河市集1禮拜1擺爾爾，攏佇每禮拜6早起
9點至下晝2點，市集的攤位非常濟，亦親像咱台灣的黃昏市場，只是規模閣較大，買賣的物件大
大細細什麼攏有，歐美觀光客非常濟，穿花衫仔褲的花瑤族閣較濟，除了手工藝品、豬肉攤、羊
肉攤、牛肉攤、青菜攤、果子攤等等以外，食的攤位攏只有在地人佇醫腹肚，一攤一攤大家食甲
喙笑目笑，其他交易品有看到：活的水牛、黃牛、驢子、馬、大塊生的蛇皮佮蛇油、青草藥頭、
藥包、羊鞭、鹿鞭、虎鞭、竹子做的樂器等等，因為離中國邊界近，亦有寡仔中國人的攤位，賣
中國製的電子科技產品，亦真受在地人愛買；觀光客是真拼勢用相機取難得的鏡頭，翕轉去做紀
念，在地人認真佇交易買賣，攢予茨內規家伙仔需要的日用品，載轉山區茨裡用‧

由北河返去老街市半途會經過中越國界，中央隔1條河爾爾，對岸是中國河口市，建築物比老街這
爿較濟、較懸、較新，欲過橋就是欲過關口，兩爿橋頭攏排真長的大貨車，越南運過中國是農產
品為主，塗炭是用火車運去中國，中國運來的是3C電子品為主，亦參有民生用品等等；佇媒體定
定看到中國烏心農產品假做越南的農產品，進口入台灣市場，可能就親像按呢過水的啦！因為越
南佮中國的國界關卡有4位，火車佮大貨車的出入，每工攏袂算得濟，山賊版的產品就無算什麼，
過水的烏心農產品閣較免講啦！只是咱台灣消費者，目睭愛撥予金，毋通貪俗，才袂想貪載雞籠
啊！

導遊請大家坐佇關口溪邊的咖啡店，品嚐正港的越南過濾式咖啡，1杯10000盾(合新台幣20箍)，
散食國家無用先進國家的濾紙式，創造會使無限使用的白鐵仔式過濾杯，實在真正有環保概念，
而且俗閣好用，越南人生活跤步寬寬仔來，[口林] 咖啡嘛是共款，朋友做火開講，用白鐵仔式過
濾杯，將芳純的咖啡，1滴1滴過濾入已經加牛奶膏的玻璃杯底，毋免趕，毋免急，大家慢慢仔欣賞
關卡的嫷風景，笑談趣味事，日子輕鬆仔過‧越南的咖啡鼻著真芳，[口林]入喙內，苦甘仔苦甘，
規個嚨喉攏迴芳，有影真讚啦！(待續)