jimmycmlin的部落格

台語文~~~~~北越6工旅遊感(3)~~~~~遊子 2009.11.16
Ha Long Bay下龍灣是這擺行程的第2個重點，真濟人講：桂林山水甲天下‧
北越的下龍灣是予人叫做海面上的桂林‧下龍灣其實親像1個大內海，有東、
南、西3的灣，無什麼大風大湧，面積有1500平方公里，企著大小總共1969個
島嶼，石灰岩的石質，是地球演變過程造出來的天然博物館，佇1994年予聯合
國教科文組織收列為世界自然遺產佮世界7大自然奇景之一‧10外年前交通無方
便，盤車坐渡船，由河內需要7~8點鐘才會當到位，後來越南政府推展觀光欲趁
錢，才造路鋪橋，現此時免3點鐘就到位囉！路面雖然無講真好，已經方便真濟
啦！觀光客亦愈來愈濟，咱台灣團來下龍灣的人數是排頭名的‧離無若遠的陸
龍灣一般是做伙安排的行程，毋過，阮這次選較罕哩去的沙霸佮老街，省掉陸
龍灣的部份‧

來到碼頭愛先驗護照才會使上船，造型無共的大小隻船排滿碼頭，氣勢雄偉，
親像三國時代赤壁之戰的感覺，只差無起鼓聲爾爾‧船隻分4種類：無艙房會
當佇船頂食飯用餐純遊覽下龍灣的風景，另外，有艙房會使予遊客蹛佇船頂隔
瞑，有7間、10間、15間等3種，船內設備服務亦有差別，阮因為人數少，是
坐7間艙房的仿古式柴船‧

阮的柴船出航囉！海面水波平靜無什麼湧，所以免驚會暈船，漸漸遠遠的島嶼
愈來愈近，愈來愈大，數量真濟，毋過無講真懸，認真講來佮桂林的景緻亦是
有精差，各有無共的風韻，下龍灣的海面開闊，島嶼圍佇四箍輪轉，予人有神
秘閣壯觀的感覺；島嶼有無共的造型：有親像大隻海翁、2隻公母對的鬥雞、
觀音外型、18羅漢、龜、龍、筆、亦有像城堡佇守護海域等等，隨人的認知去
號名攏無要緊；天頂不時有幾仔隻獵鴞飛來飛去，毋知是佇相水底的魚亦是相
島嶼內的鳥鼠？海面的船來來去去，有緊有慢，有張帆布的，有行柴油的，有
載砂石的，有載貨的，有用双手ko3的小船隻，毋過，亦是載遊客的仿古式柴
船佔上濟啦！

無共所在的海域，有一tshok一tshok的水上部落，是世代生活佇海面過著傳
統生活的族群，每工攏漂浮佇水上，共款有簡單的學校佮店仔，大人掠魚、做
生理，囡仔ko3船去海上學校讀冊，這種傳統生活實在真罕李看到‧

續落看到遠遠山頂的涼亭仔，導遊講等一下咱欲下船準備攻去山頂的涼亭仔‧
哇！看來真懸閣真[山奇]，已經真濟船隻停佇附近海面，大家攏是欲下船攻去
山頂，船靠著碼頭，順序下船，踏上Ti Toh蒂托夫島，一大片的白色沙灘，
原來是用船載沙來起的人造沙灘，有歐美遊客大聲耍沙灘排球，亦有穿泅水衫
的查埔、查某佇海面泅水、耍水，大部份的遊客開始[足百]梯崁，因為實在真
[山奇]，半山腰有一位較闊的所在予人歇睏，會使看到下仔海面的船隻，東西
南北攏有，親像拍電影時海戰的場面，真趣味閣難得‧跤力無問題的人繼續攻
頂，平時有準備，即馬就用會到，雖然，汗流滲滴大氣喘，上尾仔阮這團有6個
[足百] 上山頂的涼亭仔啦！遠遠看去的景緻閣較嫷，海戰的場面規模閣較大，
欣賞著規片下龍灣的山水海景，前仔汗流滲滴大氣喘是有價值的啦！

下山後轉上船頂看日頭落海，the佇涼椅看天頂吹海風‧四周圍漸漸予烏暗罩
落去，恬靜恬靜，只賰微微仔海風的聲音；食完phong5-phai3的海鮮料理暗
頓，繼續去船頂涼椅看天星吹海風‧踮遮的感覺佮佇沙霸的感覺又無共款，1位
是山1位是海，各有所長啦！

隔工透早6點起來看日出，毋過半暝4點外落雨，天頂烏雲猶真厚，山頂烏雲框
金巡，表示日頭出來予烏雲遮著，無法度欣賞到完整的日出啦！雖然稍可仔無
採，毋過無閣再落雨，算是真好運喔！海面有細隻船佇拋魚網掠魚，嘛有双人
的柴板船(華語講獨木舟)佇走行，船尾的水波1箍1箍擴展開去，予水面袂傷恬
靜無味；亦有6人座的快艇走行，船尾的水波白波波親像海湧滾攪；亦有佇大型
柴船間徙來徙去的細隻船，坐著1位越南姑娘佇賣生活用物，椰子、泡麵、飲料
、雞卵、水果、透抽、蝦子、鮮魚等等，做早市的生理，加減嘛有人喝伊倚過來
交關，實在真拍拼‧(待續)