台語文~~北越6工旅遊感(4)－jimmycmlin的部落格

台語文~~~~~北越6工旅遊感(4)~~~~~遊子 2009.11.17.
佇船頂食完簡單的西式早頓，柴船起錨寬寬仔徙動起行，真好運，日頭
又閣由烏雲堆探頭出來囉！無偌久又轉入另外一位海域，遠遠就看到袂
少掛帆的柴船佮阮共款的柴船已經予遊客下船上碼頭，等阮到位時，票
亭前的空地已經遊客滿滿是啦，亦是歐美客較濟，嘛有日本客、韓國客
、中國客等等，大家攏欲來遊覽探看石灰岩的天宮洞(越南語Hang
Thien Cung;英語Heaven Palace Grotto)‧其實佇下龍灣有真
濟類似的石灰岩洞，天宮洞是上大規模、上出名、遊客上濟的所在‧自
下面夯頭看去，看到洞口佇青翠的樹木佮雲海中，親像天頂的宮廷，所
以，予人號做天宮洞‧另外1個較有名的是叫做柴頭洞(越南語Hang
Dau Go)，聽講古早的越南皇帝有刻字佇hia‧

驗看手內的2日票了後，先看到世界文化遺產的標示牌企佇邊仔，續落
遊客排長龍[足百]樓梯gam2仔，慢慢仔進到入口，入口看起來無偌闊
，毋過，一入內底，哇！有夠闊！有夠深！比起金門太武山內人工開挖
的電影廳大幾仔十倍，嘛比九州的秋芳洞較大，佮桂林的蘆笛岩洞有通
比評啦！

佇洞內遊覽時，在地導遊沿路紹介說明，沿路嘛有無共色彩的電火，照
著無共的石頭，產生無共的感覺；每座大小型石筍、石柱、石針、石劍
、石山、石溪等，有逐種動物的造型，象啦、虎啦、豹啦、獅啦、猴子
、兔子、龜、鹿、等等，亦有武器的造型，神仙羅漢的造型，其實念由
心生，隨人認定無一定共款，你感覺是什麼就是什麼！歡喜就好啦！遊
客亦攏真守規矩，毋敢無亂摸來破壞‧