jimmycmlin的部落格

台語文~~~~~~為台灣的少年人煩惱~~~~~遊子
現此時的少年人，食頭路攏想欲：錢濟、事少、離茨近‧事實上是顛倒反，看到咱身邊
的序小亦是其他的少年人，定定嘛是要加班、出差，尤其是無加班費的加班，抑是，人
生會使親像甘蔗顛倒食，艱苦頭快活尾，猶是有價值‧毋過，最近去中國江南行1擺，
風景嫷無毋對，心內的感受是為咱台灣的少年人煩惱！
即次是去杭州、蘇州佮上海；杭州是中國排前3名的遊覽都市，另外2個所在是大連佮成
都，杭州、蘇州自早叫做上海的後花園；毋過，蘇州已經改頭換面囉！蘇州佮上海是最
近10年發展上緊的所在，20年前中國由廣州、深圳開始開放，漸漸往北擴大，佇蘇州看
到幾年前新加坡投資的特別工業區，因為蘇州政府仿造1個閣卡大規模，招商條件閣卡好
的特別工業區，所以，予佮中國高層關係真好的新加坡政府投資案喝輸，放棄新加坡投
資的特別工業區，尾仔又予蘇州政府接收去；另外有昆山工業區，吳江工業區等等，規
模攏是非常大，主要攏是台商為主，佇咱台灣排名前300大的企業，差不多攏有啦！連
地陪嘛承認講：(人因)即馬的日常生活和台灣有非常密切的關係‧
這當然是無白賊，因為來到蘇州佮上海鬧熱的市區，台灣口味的餐廳、飲食店、用品店
等等真濟，台商去中國投資，增加中國在地人的工作機會，(人因)每增加1個工作機會，
咱台灣人相對就減少1個工作機會；台商又需要日常生活的消費，食的、穿的、蹛的、
交通方面的、發病的時、娛樂的等等，攏嘛將錢大把開佇中國在地‧雖然，趁錢的例毋
是無，只是了錢的閣卡濟，嘛有人了錢閣予人陷害入監獄；無頭路、了錢無面子，毋敢
返轉來台灣，留佇上海予人叫做”台流”，意思是流浪的台灣人、台商，聽講佔有10分
之1，大約近10萬人左右，實在可憐，亦是家己做家己受，免怨歎啦！
看到蘇州佮上海的工商發展，台商拼命走入去，一波又一波，人去錢綴著去，去hia予
人綁跤綁手，債務留佇台灣，又配合中國政府”以經圍政”的要求，斡頭過來罵咱的政
府，(人因)實在才是無天良，目睭撥無金，干哪為著趁錢，踏入去賊船毋知死，出代誌
時，才會想到咱的政府湊出手去救(人因)；連王永慶嘛剔到鐵板，新光集團的少東予人
扣押，嘛是需要咱政府出面來救‧雖然，生理人是欲趁錢，毋過去到世界任何國家所在
，抑是無家己國家的保護，一定予人食死死，佇中國閣卡免講‧



中國雖然漸漸開放，猶原是專制獨裁、無法律制度的國家，由幾個所在看會出‧親像：
電話簿仔的排列順序，黨機關一定排上頭前，後來才是政府機關，民間公司；街頭巷尾
看到的宣傳標語，攏是黨部相關的單位具名；所有大型觀光販賣店、餐廳、飯店等等，
攏是國家經營，由黨部監督管理；對旅行團的人數控制真嚴，每工抑是有人欲脫隊揣親
朋好友，需要繳罰金人頭稅，由地陪收錢轉交予政府單位；走行全世界逐國家所在，頭
一擺拄到即種無理的規定‧可見中國猶原是什麼款國家‧
看到蘇州佮上海的發展，只是中國的一部份爾爾，想到按呢，真正是為咱台灣少年人的
工作機會來煩惱憂心啊！咱台灣是島國無毋對，經濟貿易需要行出去，行入全世界，毋
過，國際化並毋是中國化，將中國化準做國際化，是穩死啦！