台語文~~十年修得同船渡－jimmycmlin的部落格

(全體做伙攝相做紀念，甘認會出誰是誰？)

台語文~~~~~十年修得同船渡~~~~~遊子
俗語講：十年修得同船渡，百年修得共枕眠‧高醫藥學系今年拄仔是成立50週年紀念囉！
會使同齊做伙讀冊研究、耍做陣，其實亦是修得來的啊！第11屆的同窗，自入學熟似算起
來嘛拄仔好40年啦！時間佇過真正是一目{目聶}‧
即擺全系校友會的餐聚，佇高雄愛河邊的國賓飯店，席開60外桌，逐屆隨人認桌，上濟的
是15屆的5桌，因為{人因}順續慶祝畢業30週年的活動‧咱班原本認4桌，尾仔才坐滿3桌
，一半個仔臨時有事誌，無法度趕來參加，3桌亦算是排頭前啦！實在嘛是無簡單‧順這個
機會，重新整理同窗的資料，住所、電話、手機仔、電子批址等等，予同窗以後互相聯絡
較利便，尤其佇即馬網路科技發達的時代，以電子批來分享信息，真正是天涯若比鄰啊！

(認會出誰是誰？)

同窗久無相見，有規腹內講袂完的話，逐家親像倒返去40年前的心情，無管趁錢濟少、無
論地位懸低，同窗做伙攏嘛是平懸平大；雖然，有人退休囉！有人是半退休，繼續做無錢
工課，做volunteer、社會事，歡喜做、甘願受；猶有人繼續拍拼起工廠、衝生理趁大錢
，所以，有人寄付50萬箍、亦有幾仔個寄付5萬箍，其他嘛濟少隨意寄付，予母系會使來繼
續發展；毋過，人生行到即時陣，逐家攏知影，健康上要緊啦！其他攏排後壁去，因為到今
已經有8位同窗升天去，嘛知影有幾仔個同窗身體健康無通好‧真濟同窗嘛升格做阿公、阿
媽囉！孫子的相片、影片隨身紮，隨時提出來予人分享，講到孫子代，攏嘛喙笑目笑、笑甲
喙仔裂腮腮喔！