jimmycmlin的部落格

用藥保健~~~~~無法度輕鬆方便~~~~~遊子
有一份報告講：現代人無分查埔、查某、大人、囡仔，真濟人攏有無法度輕鬆方便的問題‧
這就是便秘啦！咱人愛會食、會睏、會吸收、嘛愛會放才好‧有入有出才是正常的生活好習
慣‧所以，便秘的問題，嘛是﹝勿會﹞通cing cai喔！
按怎樣才算是便秘(Constipation/Fecal impaction)？一般來講，1工排便3擺，抑是3
工排便1擺，抑是平均1禮拜排便3擺，只要﹝勿會﹞感覺排便困難、腹肚脹疼、無胃口、無
想欲食物件等症頭，攏算是正常的情形‧超過ziah的情形 就算是便秘的問題出現囉！
影響到排便的因素真濟、真複雜，毋是干哪受到腸子內的影響，嘛受到中樞神經系統、荷爾
蒙、生活環境、情緒、工作壓力、飲食習慣等等的影響‧排便的動作包括：腸仔道內壓力的
運作、骨盆腔內相關筋肉的協調、尻川口和大腸頭中間扭直的角度、尻川口內外頭的括約肌
是毋是會當完全放鬆，來達成順序排放的目的‧
大腸是專門囥糞便的所在，食落腹的物件，營養份吸收了後，上尾仔賰的殘渣廢棄物和水份
就變成糞便，所以，大腸就是排泄糞便的器官；抑是排便次數傷少，水份lim無夠，大腸內
糞便就變成硬kok kok，欲排便感覺真艱苦，這就是便秘啦！按呢，咱就了解便秘的症頭大
概是：排便﹝勿會﹞順、艱苦、有時是腹肚脹疼、尻川緊緊，放完尻川猶原重重，像中醫師
講的裡急後重症頭、一直攏感覺放﹝勿會﹞清氣‧
保持好的排便習慣和品質，會當互人感覺通身舒暢，嘛是身體健康的重要指標‧佇飲食方面
，高纖維、低油脂、每工補充有夠的水份‧因為纖維佇大腸內會當將糞便結做伙，而且嘛會
當刺激腸仔壁，互大腸的轉動卡順序，互大腸內的壓力減少，卡好排泄出去；另外，對腸仔
內益菌的增加嘛有幫助，益菌就包括乳酸菌(Lactobacillus)、比菲德氏菌(Bifidobac-
terium)和酵母菌(Yeast)等等；抑是益菌愈濟，大腸內的有害菌和伺機菌就愈歹生長，對
身體健康愈有幫助‧充足的水份互大腸內的糞便﹝勿會﹞傷硬，對排泄順序嘛是幫助真大‧
逐方面的壓力(Stress)嘛是現代人無法度閃避的，壓力傷大無調節互好，會造成自律神經
失調，胃腸道的功能失調，腸仔內的有害菌和伺機菌就增加，免疫力降低等等；所以，一定
愛會曉調節壓力，養成有規律的運動習慣，運動33制就是真好的目標，有繼續運動，會當增
加身體機能，促進新陳代謝，幫助心情放輕鬆，紓解壓力，幫助胃腸道的轉動卡順序，幫助
益菌的增加‧
真濟藥物嘛會影響到排便的功能，有的是會造成便秘，有的是會造成放軟屎抑是漏屎，所以
，拄到排便的習慣改變時，有可能是食別項藥仔引起的喔！親像：抗生素、胃腸藥、降血壓
的藥仔等等；會當去請教醫師抑是藥師，是毋是和食別項藥仔有關係‧
希望人人攏是會食、會睏、會吸收、嘛會放，生活快樂無煩惱‧